Iminig n zik

8

{{Amek i d-yeggra Dda ali?}}

Aql-aγ am yemγaren: tezwar-d temẓi si nettcali, teggra-d tewser si nettγimi.

Ammer d temγer i d-izeggiren, tili giγ leqrar i yiman-iw, meqqar ad sεuγ mmi neγ yelli, i wass-a ad zziγ γer γur-s, mi akka ulac! ur yi-d-yeggri ula d yiwen, siwa arraw n warraw n gma, widak-nni ttreγ-ten yakan ma ṭṭfen di nnif-nsen, asmi ara mmteγ a yi-meḍlen anda meḍlen imawlan-iw, d ayagi kan, i zemreγ ad ssutreγ deg-sen. Wwin-iyi-d d aserdas di lggira-nni n Lalman, aṭas n Yeqbayliyen i d-yusan di tallit-nni, mi tefra dγa qqimen ad xedmen, i wakken ad kksen laẓ γef twaculin-nsen, mi yal yiwen deg-sen yeẓra s tallelt-is ara tifsus tudert n wid t-yeggunin deg uxxam, nekk γas akken ur zwiğeγ ara, maca ğğiγ baba d yemma akk d gma di taddart, γef aya, yessefk fell-i a ten-id-γiteγ tikkelt ar tikkelt, d ayen i giγ armi d asmi ten-tewwi tmettant, ula d gma-nni ur iεeṭṭel ara yerna ikemmel di tlemmast n tegrawla Ledzayer, di tazwara bdiγ lxedma di {le tram}, sakkin kecmeγ-d lqahwa-yagi, ila tettwaliḍ ass-a teγleq, u nekk aql-i kebleγ d ayen tfukk tgecrirt-iw, ula ar texxamt ur zmireγ ara ad aliγ ad ṭṭseγ, iḍ d wass nekk γef ukkersi di tenwalt-a n lqahwa. Zik teččur s warrac Uẓeffun, ssetten da, ttaffen-d isalen i d-yettasen di tmurt, akked wid n tsertit ukabar, imir-nni, ameslay siwa af timmunent n tmurt. Llan wid d nekk i sen-yettarun tibratin, i sen-yettεemmiren lmandat, uγaleγ ssneγ akk tuddar n lεerc Iẓerxfawen, u nekk werğin i tent-yerkiḍ uḍar-iw, segmi γezzif umecwar yid-sen, tura mi yurgaγ d Aẓeffun i ttarguγ, mačči d Buγni anda lluleγ,

{{Anda i d-teggrant akk tsutwin n yimir-nni?}}

Di tegrawla-nni n Ledzayer, i d aγ-wezzεen am ibawen γef lluḥ, yal yiwen anta tama i d-yeṭṭef, ziγen zik yakan i d-yebda iγisi-agi, maca nekkni s imeγnasen imecṭuḥen ur t-nwala ara imir-nni, ala imeqqranen, Laεmec Aεmer yenna-d yiwen wawal d tidet, yenna-d: tura mi texleḍ tsertit d ddin, tikerkas ad ugtent, tidet ur tettizmir ara i tigi.
Akken i teḍra yid-nneγ, akabar yettḍeggir-aγ-id i wayeḍ, armi i d-neggra ger txenfyac n ukabar n F.L.N, d win M.N.A, awi-d kan idrimen, llan wid yettxelissen ɣer γur-sen i sin, i wakken kan ad menεen iqerray-nsen di lmut, argaz yelhan ma ur t-yenγi ara wa, a t-inneγ wayeḍ, ssluγen-aγ tagmat yellan zik,

{{Iminig-nni n zik, yusa-d mmi-s n mmi-s n gma-s, yerra-t ar wakal ideg d-yefruri}}.