Inaw n Dr Allaoua Rabhi deg umsisi Aɣelnaw Aqbayli – Timanit, d azref … d aγan

7

D azref acku ilmend n wayen iγer tessaweḍ tsertit deg umaḍal ass-a, acku ilmend n yizerfan iγef kkatent tdukliwin tigreγlanin, acku ilmend n tfadiwin i d-tesker Tuddsa n Yiγlanen-Yedduklen (ONU), yal aγref yezmer ad yessuter ad yidir deg ‘‘timanit’’, yezmer ad d-yessukkes timanit-is. Ur nezmir ad d-nini llan yizerfan n umdan ma ur yezmir umdan-nni ad yidir netta d yimdanen n uγlan-ines deg timanit.

D aγan, acku amdan yeẓran ila dacu ara d-yefk i umaḍal, yewwi-d ad asen-t-id-yesken i yimdanen akk, ad t-ẓren, ama d amezruy-ines d wayen ila d ‘‘timusniwin’’ timeγradin, yecban tugdut, talakt, war tilin n ‘‘tukksa n yixf’’; ama deg wayen yerzan udem izemren ad yif akk wiyaḍ deg unnar n tsertit, deg unnar n tdamsa d tmetti, deg unnar n tutlayt d yidles ; ama deg wayen yellan d tamuγli γer yimal akked tezmert d wallalen ilaqen i useḥbiber γef tudert s umata (azekka n tudert n yimdanen deg talwit d tlelli d wannuz, azekka n twennaḍt).

Timanit d azref, maca d aγan. Win yessarmen ad yidir deg timanit, yewwi-d ad yizmir i yiman-is (timanit, niqal d tazmermant) ; ad yizmir i yiman-is, ad yizmir i wiyaḍ, ad yissin amek yemmager wiyaḍ. Win yessarmen ad yidir deg timanit, yefk-d udem n uγerman, udem n umdan yettaken azal i tmusni akked tussna, yekkaten ad yessiẓ tilas n tillas, yettaken azal i tudert.

Aγerman, amdan yessnen ad yeddu gar watmaten-is – imdanen n umaḍal – tikli tazeddgant, i yegren, i yessentan, i yeẓẓan tikti n timanit deg wallaγ-is, yessen amek ara yezger i wugur ara d-yettmagar yal ass deg ubrid n umennuγ yettawin s iswi, yessen amek ara yali tisawnin yeqqnen γer tektiwin n wungifen, wid yettarran timanit d taεdawit gar Yizzayriyen. Aγerman, ameγnas n timanit, d win yesselmaden atmaten-is akken ad amnen s wayen yellan deg-sen, γur-sen, yuklal tiririt n wazal akked usnerni.

Yewwi-d ad ad yessiweḍ umdan ad yissin ad yefru tilufa n tudert war tamuγli s igenni, ad yali wallaγ-is γer uswir ur nesri i kra n tezmert ara d-yekken seg deffir tilawt. Ameγnas n timanit, d aγerman-nni i d-yekkan sennig yir uguren, d ameγnas i yerran azal i yiman-is war zzux, war takerrist n (yir) temγer ama sdat watmaten-is n Tmurt, ama sdat watmaten-is n Tmura.

Ameγnas n timanit, Tamurt i yessuturen timanit, yewwi ad tili d amedya i Tmura-nniḍen, ama deg unnar n tsertit, ama deg unnar n tdamsa d tmetti, ama deg unnar n tutlayt d yidles.

-1 Deg unnar n tsertit, deg wayen yezrin, ur tufiḍ i yelhan. Ama deg tγiwanin, ama deg twilayin, ama deg ugraw aγelnaw : akken yenna umedyaz, d ayen ur nettraǧu i d-yettifriren. Neẓra yessawen ubrid n tsertit, yessa d isennanen, maca nra isennanen-nni ad ilin d izeddganen, ur d-gellun s usulem n tfidi. Tegget tazzla s akersi – ggtent tazzliwin –, texleḍ tsertit akked yir iswan, tessur tezdeg d wammus, tigemmi yal ass tnegger, nekni nettwali. Tamurt yessaramen timanit, am tin ilan timanit, yewwi-d ad tili tisuddwin timagdayin, beddent γef yilugan iwatan, inesγuma yellan deg-sent, d ufrinen i ilan tezdeg deg tikli, tazmert i useddu n tlufa timeqqranin n Tmurt, d usirem deg ferru n wuguren n yimdanen.

-2 Deg unnar n tdamsa, mayella zik arraw n Tmurt zemren i laẓ-nsen s wayen i das-d-yettarra wakal-nsen akked tidi-nsen, mayella zik llant tmura iγer irezzu mmi-s n Tmurt akken ad yekkes laẓ-is, ass-a amaḍal yuγal d yiwet n taddart meqqren, ideg msawan wuguren, d wid n temẓi neγ d wid n tewser. Da, yewwi-d (acku d aγan) ad yerr azal i wayen akk igemmen deg wakal-ines, yettak-d tigelliwin i yimdanen d yiγersiwen, ad yerr azal i tzemmar timetwilin d unegmu n tussna akken ad qqlent temguriwin d tizeddganin (ayen i izemren ad d-yekk seg yiṭij, seg waḍu, seg waman, seg yimγan), iswi-nsent d amdan d twennaḍt. Ameγnas n timanit, d win yessefraken tigelliwin akken ad idirent i wara-n-wara, d win yettarran tawant i wallaγ akken ad tidir tawant deg wadis. Akken ur yettlaẓ umdan, akken, ma yecca yejjiwen (quand il a mangé à satiété), ur yetteffeγ dγa anda yečča, ur yettett amur n wayetma-is, ur yessamas tawennaḍt. S ubrid am wa, s uγerman am wa, γas ad d-tessekcam Tmurt tigelliwin seg Tmura, ad tissin amek ara tessufuγ ayen yellan ines.

-3 Deg unnar n tutlayt d yidles, dγa din i tekres taluft. Seg zik n zik, akk iγerfan i d-ikecmen glan-d s tutlayt-nsen, s yidles-nsen (taγerma, amezruy), glan-s s tirga-nsen. S tutlayin-nsen ay sbedden iwunak, d tisekliwin-nsen ay d-yufraren. Ula mi ara ṭṭfen, tikwal, warraw n Tmurt adabu, s tirga n umnekcam i t-ttaṭṭafen (amedya n Masnsen i yessqedcen deg tgelda-ines snat tutlayin ta deffir ta : tafniqt, talatint). Yettmeslay-aγ-d umezruy n tallit tanemmast γef ‘‘tgeldiwin’’ timaziγin yessentan lislam, ar ass-a ur neẓri dacu yellan d timmuzγa deg tgeldiwin-a. Tutlayt d yidles n Yimaziγen, seg teglest (zzman adqim) zgan deg ugama, ur kcimen deg uγrem, ur kkin deg usebded i yiwunak. Ass-a yewwi-d yal amdan ad yaγ amur-is deg tlelli, deg tlelliwin, akk tilelliwin, gar-asent tilelli n wawal. Takerrist n tmeslayt ilaq ad tefsi, ad yessebded umadan awanek-is, ad yesselḥu tilufa-s s tutlayt-is. D azref, d aγan. Ur telli, ass-a, kra n tutlayt ara yizmiren ad tidir i wara-n-wara ma ur tettwaseqdec timawt tira, anagar mayella reglen yimawlan-is iberdan yessufuγen yessekcamen gar-asen d yiγefran-nniḍen. Neẓra, ma yergel umdan tiwwura γef yiman-is, d tamettant-nniḍen i t-yeggunin ! Da ay d-yettban wazal n tririt n wazal i yiman d wannuz s ara d-yeglu wanect-a sdat wiyaḍ. Ma yessen umdan iman-is (tutlayt-is, tirga-ines), yezmer ad yissin wiyaḍ s wudem n tezdeg d wannuz. Tutlayt-nneγ d tamaziγt, d taqbaylit, d tacawit, d tumẓabt, d tacelḥit, d tarifit, d tamaheγt. Takerrist-nniḍen din yerzan tamaziγt ma d tutlayt neγ d tutlayin. Tutlayt-nneγ d tamaziγt, deg-s taqbaylit, deg-s tiyaḍ : yiwen ur yezmir ad d-yini anagar taqbaylit ay yellan deg uḍris-a, awi-d kan ad tili d awal ikeysen, d awal i d-yeqqaren tiktiwin, akk tiktiwin ! Awi-d kan tutlayt ad tili d tutlayt tagamant n tmetti ! Tutlayt taγelnawt tunsibt, d ayen-nniḍen.

Bgayet, amenzu n yibrir 2011

{sell i yinaw n Dr Allaoua Rabhi}


7 COMMENTS

  1. Tanemmirt a Mass Rabhi ɣef leqdic-ik azeddgan. Tajmilt-ik d tameqqrant imi ayen akka id tenniḍ d awal n tidet zeddigen am udfel yettrusun ɣef tqucac n yexxamen n tuddar n leqbayel. Nessaram-ak, i kečč akked wid ik-yettaken anzi, tazmert n tzemmurt, tahuski n tefsut d tumert alama d lmut !

  2. dayen kan i d abrid, abrid ara yeḍfer yal win yessaramen timanit, yettamnen s tmanit, yekkaten iwakken ad tili tmanit, Mass rabḥi yewwi-d abrid n liser, abrid yessawaḍen ɣer timanit ifazen, tin akken yessaram yal win yesɛan kra n tismin ɣef yiman-is, ɣef tmurt-is, ɣef lejdud-is.
    ur ssineɣ ara Mass Rabḥi akka deg wudem, maca ssneɣ-t s tira-s, s taččart n uqerruy-is, s lǧehd n tektiwin-is, ladɣa ṛẓana i yas-yernan tahuski ugar..
    Akka ihi a wid yebɣan timanit, abrid ara taɣem d wa, d ayen i d-yenna Mass Rabḥi, abrid-nwen d abrid n umennuɣ n liser, amennuɣ aserti, adelsan, ulayɣer times, taruẓi, ulayɣer ayen i d-yettaken udem n dir,
    tanemmirt i Mass Rabḥi, tanemmirt-nwen akk, afud igerrzen tawenza yelhan, tudert-nwen tettkemmil ɣer zdat, afus deg ufus taâkemt ẓẓayen ad tifsus!

  3. azul mas allawa.

    tanemmirt-ik ghef leqdic -ik d tektiwin d iwellihen i d-tefkit deg udris-a ghef tmanit.

    iqvaylin ugaden kan adavu sesg zik, umma zran belli s timanik kan ay zemmer ad refden iman-nsen, d wad seddun iman-nsen s yiman-nsen, akken i d-tennit deg awal-ik !

  4. azul, tanemmirt aṭas a Mass Rabḥi γef tektiwin-a-inek, d ayen ittemmalen abrid i tudert-nneγ, a wi yufan inaw, i d-tenniḍ ad yaweḍ akk ar tmeẓẓaγ n Leqbayel a ten-id-yessaki, i wakken ad ddun deg iwellihen-a yessuffuγen, a wi yufan daγen, wid akk ixeddmen tasertit ur tettun ara tutlayt-a-nneγ, annaγ d tagi i d tamezwarut n tmezwura γef i nettnaγ, ilaq ad fken amedya i wid i sen-isellen, acku tineggura-yagi ttun-tt akk, εni tzad-asen leqraya neγ amek, menyif a tt-id-sxelḍen d tiyiḍ, wala ma ulac-tt akk deg inaw neγ deg tmesbaniyin ttgen!

  5. tanemmirt ɣef yinaw-agi-inek ay izem.
    Bɣiɣ {{ad rreɣ tajmilt i Mass Ɛellawa Rabḥi imi d-yefka awal s tmaziɣt.}} D ayen ilaqen aṭas, imi nekkat ɣef timanit, ntettu ayen i ɣ-yezdin: tutlayt-nneɣ.
    D tutlayt-nneɣ ilaqen a tt-nesnerni: s useqdec-ines ladɣa di tegnatin yecban ta.
    Yessefk a s-nefk tagnit ugar di tesdawit s usṭuqqet n tezrawin (études), d unadi.
    {{tutlayt-nneɣ tettmettat cwiṭ cwiṭ, neqqen-tt yeɛdawen ur nẓer: tilibizyu, rradyu, lqella uselmed, lqella useqdec, …}}
    {{ilaq imussnawen yellan am kečč, d inelmaden ara iḍefren abrid-nwen, ad leqḍen (collecter) tutlayt-nneɣ seg imawen n yemɣaren d temɣarin}} yellan di tqucac idurar, yemwezzaɛen deg tuddar. D imukan-a i iḥerzen ar assa tameslayt-nneɣ si nnger. Yal amɣar d temɣart, yeddem tamussni, ilaq a tt-nagem weqbel ad ifat lḥal.
    {{Ssarameɣ daɣen, ad tili « une académie », ara iḥerzen u ara yesnernin tutlayt-nneɣ, mačči win i d-yusan kan a d-yesnulfu awal}}. Imdanen bɣan tameslat-nneɣ, dacu kan ur ḥemmlen ara aserwet, bɣan ad tili tuddsa (organisation) iwulmen ara yeskelfen s waya. medden yakk ḥwaǧen annecta: Ineɣmasen, iselmaden, inelmaden, imeɣnasen n tmaziɣt…… imussnawen llan ama da ama dihin, ayɣer ihi aɛeṭṭel ?!
    ttwaliɣ a mass Ɛellawa Rabḥi, ẓriɣ teḥsiḍ annecta, ad yekker leqdic ɣef tutlayt nneɣ di tesdawiyin ladɣa, ur nettraju ara ddula, acku ur nettraju lxir seg weɛdaw.
    afud igerrzen
    tanemmirt.

  6. azul : as-nigh tanmirt i mass allawa rabhi , i wduktur amezwaru n lwilaya n bgayet , ig lulen deg ighil wis negh ighil yetwt-tun (taghiwant tizi n berber) at cekregh ghef leqdic ig xdem , asisegh-zef y ilu di tudrt axater mazal n hwajit s wattas……….ar tufart.

LEAVE A REPLY

Please enter your comment!
Please enter your name here