Inaw n Dr Allaoua Rabhi deg umsisi Aɣelnaw Aqbayli – Timanit, d azref … d aγan

7

D azref acku ilmend n wayen iγer tessaweḍ tsertit deg umaḍal ass-a, acku ilmend n yizerfan iγef kkatent tdukliwin tigreγlanin, acku ilmend n tfadiwin i d-tesker Tuddsa n Yiγlanen-Yedduklen (ONU), yal aγref yezmer ad yessuter ad yidir deg ‘‘timanit’’, yezmer ad d-yessukkes timanit-is. Ur nezmir ad d-nini llan yizerfan n umdan ma ur yezmir umdan-nni ad yidir netta d yimdanen n uγlan-ines deg timanit.

D aγan, acku amdan yeẓran ila dacu ara d-yefk i umaḍal, yewwi-d ad asen-t-id-yesken i yimdanen akk, ad t-ẓren, ama d amezruy-ines d wayen ila d ‘‘timusniwin’’ timeγradin, yecban tugdut, talakt, war tilin n ‘‘tukksa n yixf’’; ama deg wayen yerzan udem izemren ad yif akk wiyaḍ deg unnar n tsertit, deg unnar n tdamsa d tmetti, deg unnar n tutlayt d yidles ; ama deg wayen yellan d tamuγli γer yimal akked tezmert d wallalen ilaqen i useḥbiber γef tudert s umata (azekka n tudert n yimdanen deg talwit d tlelli d wannuz, azekka n twennaḍt).

Timanit d azref, maca d aγan. Win yessarmen ad yidir deg timanit, yewwi-d ad yizmir i yiman-is (timanit, niqal d tazmermant) ; ad yizmir i yiman-is, ad yizmir i wiyaḍ, ad yissin amek yemmager wiyaḍ. Win yessarmen ad yidir deg timanit, yefk-d udem n uγerman, udem n umdan yettaken azal i tmusni akked tussna, yekkaten ad yessiẓ tilas n tillas, yettaken azal i tudert.

Aγerman, amdan yessnen ad yeddu gar watmaten-is – imdanen n umaḍal – tikli tazeddgant, i yegren, i yessentan, i yeẓẓan tikti n timanit deg wallaγ-is, yessen amek ara yezger i wugur ara d-yettmagar yal ass deg ubrid n umennuγ yettawin s iswi, yessen amek ara yali tisawnin yeqqnen γer tektiwin n wungifen, wid yettarran timanit d taεdawit gar Yizzayriyen. Aγerman, ameγnas n timanit, d win yesselmaden atmaten-is akken ad amnen s wayen yellan deg-sen, γur-sen, yuklal tiririt n wazal akked usnerni.

Yewwi-d ad ad yessiweḍ umdan ad yissin ad yefru tilufa n tudert war tamuγli s igenni, ad yali wallaγ-is γer uswir ur nesri i kra n tezmert ara d-yekken seg deffir tilawt. Ameγnas n timanit, d aγerman-nni i d-yekkan sennig yir uguren, d ameγnas i yerran azal i yiman-is war zzux, war takerrist n (yir) temγer ama sdat watmaten-is n Tmurt, ama sdat watmaten-is n Tmura.

Ameγnas n timanit, Tamurt i yessuturen timanit, yewwi ad tili d amedya i Tmura-nniḍen, ama deg unnar n tsertit, ama deg unnar n tdamsa d tmetti, ama deg unnar n tutlayt d yidles.

-1 Deg unnar n tsertit, deg wayen yezrin, ur tufiḍ i yelhan. Ama deg tγiwanin, ama deg twilayin, ama deg ugraw aγelnaw : akken yenna umedyaz, d ayen ur nettraǧu i d-yettifriren. Neẓra yessawen ubrid n tsertit, yessa d isennanen, maca nra isennanen-nni ad ilin d izeddganen, ur d-gellun s usulem n tfidi. Tegget tazzla s akersi – ggtent tazzliwin –, texleḍ tsertit akked yir iswan, tessur tezdeg d wammus, tigemmi yal ass tnegger, nekni nettwali. Tamurt yessaramen timanit, am tin ilan timanit, yewwi-d ad tili tisuddwin timagdayin, beddent γef yilugan iwatan, inesγuma yellan deg-sent, d ufrinen i ilan tezdeg deg tikli, tazmert i useddu n tlufa timeqqranin n Tmurt, d usirem deg ferru n wuguren n yimdanen.

-2 Deg unnar n tdamsa, mayella zik arraw n Tmurt zemren i laẓ-nsen s wayen i das-d-yettarra wakal-nsen akked tidi-nsen, mayella zik llant tmura iγer irezzu mmi-s n Tmurt akken ad yekkes laẓ-is, ass-a amaḍal yuγal d yiwet n taddart meqqren, ideg msawan wuguren, d wid n temẓi neγ d wid n tewser. Da, yewwi-d (acku d aγan) ad yerr azal i wayen akk igemmen deg wakal-ines, yettak-d tigelliwin i yimdanen d yiγersiwen, ad yerr azal i tzemmar timetwilin d unegmu n tussna akken ad qqlent temguriwin d tizeddganin (ayen i izemren ad d-yekk seg yiṭij, seg waḍu, seg waman, seg yimγan), iswi-nsent d amdan d twennaḍt. Ameγnas n timanit, d win yessefraken tigelliwin akken ad idirent i wara-n-wara, d win yettarran tawant i wallaγ akken ad tidir tawant deg wadis. Akken ur yettlaẓ umdan, akken, ma yecca yejjiwen (quand il a mangé à satiété), ur yetteffeγ dγa anda yečča, ur yettett amur n wayetma-is, ur yessamas tawennaḍt. S ubrid am wa, s uγerman am wa, γas ad d-tessekcam Tmurt tigelliwin seg Tmura, ad tissin amek ara tessufuγ ayen yellan ines.

-3 Deg unnar n tutlayt d yidles, dγa din i tekres taluft. Seg zik n zik, akk iγerfan i d-ikecmen glan-d s tutlayt-nsen, s yidles-nsen (taγerma, amezruy), glan-s s tirga-nsen. S tutlayin-nsen ay sbedden iwunak, d tisekliwin-nsen ay d-yufraren. Ula mi ara ṭṭfen, tikwal, warraw n Tmurt adabu, s tirga n umnekcam i t-ttaṭṭafen (amedya n Masnsen i yessqedcen deg tgelda-ines snat tutlayin ta deffir ta : tafniqt, talatint). Yettmeslay-aγ-d umezruy n tallit tanemmast γef ‘‘tgeldiwin’’ timaziγin yessentan lislam, ar ass-a ur neẓri dacu yellan d timmuzγa deg tgeldiwin-a. Tutlayt d yidles n Yimaziγen, seg teglest (zzman adqim) zgan deg ugama, ur kcimen deg uγrem, ur kkin deg usebded i yiwunak. Ass-a yewwi-d yal amdan ad yaγ amur-is deg tlelli, deg tlelliwin, akk tilelliwin, gar-asent tilelli n wawal. Takerrist n tmeslayt ilaq ad tefsi, ad yessebded umadan awanek-is, ad yesselḥu tilufa-s s tutlayt-is. D azref, d aγan. Ur telli, ass-a, kra n tutlayt ara yizmiren ad tidir i wara-n-wara ma ur tettwaseqdec timawt tira, anagar mayella reglen yimawlan-is iberdan yessufuγen yessekcamen gar-asen d yiγefran-nniḍen. Neẓra, ma yergel umdan tiwwura γef yiman-is, d tamettant-nniḍen i t-yeggunin ! Da ay d-yettban wazal n tririt n wazal i yiman d wannuz s ara d-yeglu wanect-a sdat wiyaḍ. Ma yessen umdan iman-is (tutlayt-is, tirga-ines), yezmer ad yissin wiyaḍ s wudem n tezdeg d wannuz. Tutlayt-nneγ d tamaziγt, d taqbaylit, d tacawit, d tumẓabt, d tacelḥit, d tarifit, d tamaheγt. Takerrist-nniḍen din yerzan tamaziγt ma d tutlayt neγ d tutlayin. Tutlayt-nneγ d tamaziγt, deg-s taqbaylit, deg-s tiyaḍ : yiwen ur yezmir ad d-yini anagar taqbaylit ay yellan deg uḍris-a, awi-d kan ad tili d awal ikeysen, d awal i d-yeqqaren tiktiwin, akk tiktiwin ! Awi-d kan tutlayt ad tili d tutlayt tagamant n tmetti ! Tutlayt taγelnawt tunsibt, d ayen-nniḍen.

Bgayet, amenzu n yibrir 2011

{sell i yinaw n Dr Allaoua Rabhi}