Inig d uvrid ur nessufuγ

0

Mi ara d-yaf iman-is umdan ulac dacu is d-iqimen, ulac dacu ara as iruḥen ikeffu deg-s usirem. Imiren i tt ittak i jjiḥ. Imiren i iḍelleq i yiman-is ittuγal ur d-iclig deg acemma, ur ittagad acemma. Izzuγur iman-is amzun ẓẓay γef yiman is. Mi ara as d-yivrik uvrid zdat wallen-is ikkat kan akken yufa. Maca, timti ara as ternuḍ tawacult, tettuγal taâkumt ẓẓayet nezzeh, ẓẓayet ugar n wayen i umi izmer. Tamasit n tarwa ulamek ara as tevruḍ, ulamek ara tt tefkeḍ i wayeḍ. D aya ihi i γef reffden tiwaculin d tarwa d wayen sâan d igarwajjen u ttaṭṭafen avrid n yinig. D inig d uvrid ur nessufuγ imi ttwaṭafen am imerga di tcerkett. Almi waḥlen ulamek tiẓẓin ar zdat ulamek tuγalin ar deffir.

Akka id-ttafen iman nsen fkan kra sâan akken ad xelsen rrekva di teflukin d lembbaver i ten ittawin ar tmura n Turuft illan γef icuḍaḍ n ugerakal. Di teflukin, is izeggren, ttafen iman nsen am iselman di bewwaḍt, sennan wa γef wa. Aṭas seg sen i ittmettaten, aṭas seg sen i ittwanγan daγen. Nesla s wid ittwaḍegren ar waman, ar yillel. Tikwal mi ara ineqlav yilel diγen, ad izehher am uwaγzniw, ad kkatent lemwaji neγ tayyugin, iten ittselliken ala tiḍaf n tefsirin n Ṭṭelyan neγ n Fransa. Xas akken iqerray ccuren d tirga, ulawen ccuren s usirem. γef imawen zgan: “imahat a naweḍ, imahat a nessiwed! Wisen ma nemnaâ, wissen ma nettwaṣṣer.” Macci d ayen fessusen γef uvavat mi ara rsent wallen is γef arraw-is illuẓen, ittrun, tettvan tugdi γef udmawen nsen.

Mi ersen iḍaren nsen ar iftisen d isugan n Turuft, amzun amecwar amenzu ddant, tiremt tamenzut sâeddan-tt. Nutni imiren ivdan ttaγen avrid ur ssinen. Imiren, din i ivda y inig d uvrid ur nessufuγ. Imiren atnin gar ivardan. Sani ara erren sani ara ruḥen? Dacu ara d-sarsen i tarwa mi ara llaẓen? Kra ttawint ten imsulṭa n Ṭṭelyan, n Fransa neγ n Llekgrik ar ammasen n temsulta neγ ammasen n izruzaγ. Imi ulac aṭas imukan ttsennin ten am tesgar n tuga deg irrin. Dina ittili ccaqlal d umeṛzi. Aḍḍanen dgahen ur qqimen ara!

Akken mazal ur ikeffu ara fell asen lḥif! Kra seg sen ttaṭafen avrid anda nniḍen. Deg ikamyunen kan akken i ten ttsettifen. Aṭas seg sen i ikkufren, i immuten. Kra din d asirem n tudart ilhan, n tudart di talwit. Di Hungarya ufan akamyun ittawin ifarisen isemmaḍen iccur d izruzaγ n Surya. Mmuten s ukufer. Di Tutrict kif kif ufan ten ssufuγen rruḥ dγa ewwin ten gefgafi ar sviṭar. Llan yerna gar asen llufanat.

Akken walaγ issefk γef Turuft asen tuγal lmendad. Win irewlen γef ttrad d azrazaγ iḥlajj alel, iḥlajj afus, iḥlajj tayett i γef ara isenned. Ama meqqer ama meẓẓi cwami d tugdi n ttrad macci d ayen ara iffer umdan, macci d ayen iḥellun s uγiwel. Ilaq asent wakud, tlaq asent tudart di talwit. Tigi ala di Turuft izemren ad tent afen. Yak fell asent ittnadin?

Maca zriγ daγen aṭas γef Turuft. Kra di tmura ines ḥeslent di tizγennin tudmisin d iγevlan nniḍen u tura ilaq ad rnunt iminigen. Ilaq ad ten seccent, a ten jjint, a ten ssensent u ad asen uqment lekwaγed. Anect-a iḥlajj tadrimt d iγalen acku macci d yiwen ad tveddeḍ γur-es. Macci d ayen ara tqami yiwet neγ snat kan si tmura n Turuft. Anda-tt tifrat ihi? Ulac tifrat fessusen, simmal ittili cwal d ttrad di tmura ad illin wid ara ittarwalen, izruzaγ. Simmal ittilin izruzaγ simmal tadrimt d umeṣruf ssawalen i wiyaḍ di Turuft, aγvel issawal i wayeḍ. Yiwen meâḍur, wayeḍ aḥlil. Maca aken tevγu tili tegnitt, wid ittwaṭṭfen gar tucar, wid i γef medlent tewwura d iminigen n tmara d twaculin nsen. Ahlil! Msakit ttuγaḍen. Maca ayen timura taâravin ur sekrent tilisa n tmura nsent? Ayen ur d-girent ara iman nsent akken ad ṭṭfent afus i watmaten nsent?

Wisen ayen! Ahata d ayen kan i d nutni, d ayen kan i d Aâraven!

 

LEAVE A REPLY

Please enter your comment!
Please enter your name here