Iqbayliyen d uskasi ɣef tnekkit di Fransa.

2

Amezruy yesken-aɣ-d belli tamḥersa (amnekcam) tzemmer ad teffer tayeḍ. Ass-a daɣen deg tmurt n Fransa, aẓar neɣ idles iteffer wayeḍ.

Mi nmuqel ɣer uskasi-a n tnekkit, a d-naf belli ineqqisen d tmuɣli n tegduda ɣer iẓuran d idelsan yellan di tmurt-a ur εdilen ani (ara).

Aselway Sarkozi yakk d ifransisen i d-yusan seg Turuft ur yettwaxlaḍ uẓar-nnsen neɣ idles nnsen d wiyaḍ.

Di tazwara n uskasi, aselway n terbaεt tamnayt n ukabar UMP, F. Coppé yena-d deg yiwet n tdiwennit yessujed-d yiwen n wahil i uselmed n tutlayt taεrabt i yakk ilmeẓyen yesεan iẓuran d Tefriqt Ugafa. Wissen ma iεemmed ɣef tatut n tutlayin timaziɣin nniḍen neɣ ur yessin ani belli llan iqbayliyen yeffuden almud n tutlayt n yimawlan-nnsen?!!

Ma d tinekkit taqbaylit tettwasenger deg tmurt-is. Aqla-ɣ s uɣilif d tikerẓi i nettwali ayen swacu i d-yegla usenger-a. Nuɣal almi ula di tmurt n Fransa, sseɣḍaren idles-nneɣ deg idelsan nniḍen.

Tagduda n Fransa tesdukkel aɣref aqbayli d iɣerfan nniḍen, terra-t am nutni, neɣ teḥseb-it am yiwet n terbaεt n ddin.

Aɣref Aqbayli yefruri-d seg twacult tameqqrant n Imaziɣen. Netta yessutur timanit i tmurt-is i wakken ad d-yerr leqder d sser i s-yettwaksen, ad yekkes daɣen azaglu i d-yersen fell-as.

Iqbayliyen yettidiren deg tmurt n Fransa ttaken akk afud-nsen i useḥirbeb ɣef tugdut d talakt. Tinekkit tafransist ur tezmir ad timɣur anager ma tefka yiwet kan n tmuɣli i merra idelsan iberaniyen yellan deg-s, war ma tga amgirred ger-asen.

Asnulfu n yiwet n tsudut n yidles amaziɣ d ayen ara s-yefken afud igerrzen, d win ara d isseknen belli Fransa tettqadar merra idelsan.