Isem-is Ssaɛid Meqbel

1

Ass n 3 Dujenber deg usseggas 1994, i yemmut Ssaɛid Meqbel, i nɣan Ssaɛid Meqbel. Anwa i t-yenɣan ? Ayɣer i tenɣan ? Anwa i yellan deffir tmettant-is ?

Tiririt ɣef isteqsiyen-agi tban, ɣas akken ur tt-id-nnin. Ssaɛid Meqbel yeẓra anwi i la ineqqen, yeẓra ayen i la neqqen, yenna-t-id, ur yugad akken ugaden wiyaḍ.

Yeggul ur yeḥnit ɣef tidett ad yennaɣ, ɣef tugdut ad yemmet. Acku yeẓra d acu i la ttnadin widenni ( adabu ); ẓran tidett tella ɣer wid yeɣran, tella deg imusnawen. Di yal tikelt i deg ara nɣen win yeɣran d tidett deg-s ibɣan ad nɣen, d tidett deg-neɣ, deg wegdud ibaɣan ad nɣen.

Yella walbaɛḍ ɣas ulac-it, ma yella seg twacult yettaẓen ɣer sdat. Tawacult i zedɣen axxam n tidett, axxam izedɣent tirga, axxam n wat tlelli.

ɣas nɣan Ssaɛid Meqbel, ur zmiren ad d-ksen ameṣmar n tidett yentan deg wul n lbaṭel. Ameṣmar ur nettissin ṣdid iḥuzan ulawen n wid it-yenɣan. Ameṣmar i yellan d anagi ɣef wid i d- yennan:“{ Aqlaɣ dagi ur nqebbel lbaṭel, ur nettagad lmut, ur nessusum sdat wid yebɣan ad nuɣal ɣer deffir.}” Ger-asen yella Ssaɛid Meqbel, Ṭahar Ǧaɛut, Busebsi, Flisi…atg

Tidett ass-a ma yella tedreg ɣef wallen, d tamuɣli i iwehhan s ayen nniḍen. Ur yemmut Ssaɛid Meqbel, ur d-grin wid i t-yenɣan. Acku asmi iqesden ad t-nɣen, i iẓran d acu i d azal-is di tmetti. S lmut-is rnan-as azal, azal-nni iksen i yiman-nsen.

Yemmut Ssaɛid Meqbel, ilul Ssaɛid Meqbel…

Irnaten Murad