Kaysa Xalifi tekcem tawwurt n usgunfu

0
410
Kaysa Xalifi
Kaysa Xalifi

TAMURT – Iḍelli, 25 di yunyu 2018, d ass anda tamurt akk n leqbayel temmekta-d ass n tmenɣiwt n Matoub Lounès, ulac tama deg tmurt n Leqbayel anda ur as-rrin ara tajmilt i win akken i ɣ-yeǧǧan s leqreh d ammeqran 20 iseggasen-aya. Ulawen iḥeznen s usmekti n Matoub Lounès rnan felqen mi slan s tmettant n Kaysa Xalifi yellan d tamarut. Am akken i qqaren Leqbayel si zik « ifeddix tirɣi », irna-d leḥzen ɣef win yellan. Ad yeḥzen wul axaṭer d tamarut i ḥemmlen akk yimeɣriyen n tsekla taqbaylit.

Kaysa Xalifi tettwassen s waṭas s wungal-ines « Iḥulfan » i d-yeffɣen deg useggas n 2017.  Tilemẓit-a tura aṭas n tullisin akked yisefra i d-teǧǧa d agerruj i tutlayt taqbaylit. Akken daɣen i tettekki deg leqdicat n usideg (asuɣel) ar tutlayt taqbaylit am VK.com akked kra n yisnasen-nniḍen.

Ɣas ass-a tɣab gar wallen, meɛna imdanen akk ttwalin-tt deg wallaɣ-nsen. Ɣas akk ur nettuɣal ara ad nsel i ṣṣut-is, meɛna teǧǧa-yaɣ-d tira-s i ɣ-d-yettmeslayen. Ɣas akka tɣab ɣef wallen, meɛna mazal-itt yerna ad tili deg ulawen. Sgunfu di talwit a wettma-tneɣ Kaysa Xalifi

Amaziɣ Aweɣlis