Lmerruk : Tiliẓri taɣelnawt Tamaziɣt tlul-d

0

Lmerruk iserreḥ-d s udem unṣib ass-nni larebεa i tiliẓri taɣelnwat n tmaziɣt, tin « ara d-yettaznen s 70 s kraḍ n tutlayin timaziɣin timerrukiyyin », akka i d-yenna i AFP uneɣlaf amerruki n Teywalt, mass Xalid Naṣiri.

Isem-is Tamaziɣt, tiliẓri-a tamaynut ad d-tettazen (daɣen) ahilen ideg ara d-ssefhamen iksar-nsen s tira n taεrabt, akken « mačči ala imaziɣen ara tt-yettwalin », i d-yerna mass Naṣiri.
Γer Ḥmed Bukus, anemhal n IRCAM, « aya d aggaḍ ɣer teεwint i Yimaziɣen yeffuden idles-nsen ».

Dacu kan IRCAM yiwen ur d-yessuter afus-is ilmend n uheyyi n wahilen. “Acku tiliẓri-a teṭṭaffar taɣlift n Teywalt akked Tkebbanit taɣelnawt n rradyu d tilibizyu (SNRT), i d-imeqqet mass Bukus i AFP, maca yessefk daɣen ad d-nini belli ciwren-aɣ-d ɣef wayen ara d-yettilin daxel n wahilen”.

Imerrukiyen zemren ihi akka d tasawent ad ttwalin Tamazɣt, s ttawil n TNT akked lxiḍ, sdis (06) n timar deg wass ussan n smana, ad taweḍ alma d mraw (10) timar deg taggara n smana. Ahilen ara d-yettuɣalen dima ur beddun ara almi d ass n 1ru n meɣres.

Tamaziɣt – niqal ara yebdun ass n 30 duǧember yezrin- ad d-teskanay tidwilin n tukksa ɣef wul, irupurtajen, isallen, timezgunin d isura, akk-nsen-d ffɣen-d seg Lmerruk, i d-yessegza Muḥemmed Mamad, anemhal n tiliẓri.

« Sarameɣ ad nessiweḍ ad d-nessufuɣ ahilen n tdamsa akked yidles igerrzen, yerna deg wakud anda i ṭṭuqten imferrǧen. Tilibizyuwat nniḍen sskenayen-d aya deg lewqat ur nelhi », i d-yenna mass Mamad.

Γer Fayṣel Larici, Anemhal n SNRT, « aṭas n yimdanen (20 ineɣmasen d 70 itiknisyanen) i yettwasqedcen » ilmend n umaṭṭaf-a amaynut, iwumi d-iṣaḥ 60 imelyan n dirham (azal n 5 imelyan n euro) deg useggas akken ad yelḥu.

LEAVE A REPLY

Please enter your comment!
Please enter your name here