Timenγiwt-is, ass-nni n 25 yunyu 1998 di tala bunan, tessawed isem-is ad yuγal d amedya n tissas di tmurt n iqbayliyen ifuden tilelli. Isem–is isemγi-d zznad i wegdud terza lmerta, akken ad kemlen abri-is, alama wden s asirem-is.
Lwennas meεtub inğer-d abrid s tikti-s d umennuγ-is. Tuγac-is d tirsasin, d awezγi ad yeknu, zdat lbațel uzzal, γur-s d uffal, s imeslayen-is i t-yettruzu.
Lwennas meεtub yebda amecwar n ccna n taqbaylit i wakken ad yeğğuğ timett-is ad yerr zzerb i tamhuqranit n udabu, ad yezdi tagmat iqbayliyen iγunzan tadukli, akken yiwen ur ten-yettruzu.
Lwennas meεtub ifaq di tezwara d akken tamedyazt-is teγleb rrsas n uğadarmi nni n micli i t-igezmen deg aggur n tuber1988.
Lwennas meεtub s tezlatin-is yennul ayen ak iceγben timetti n iqbeyliyen; d ayen i t-yeğğan yekcem i lebda netta mazal-it yedder!
Tikta-s i d-yettawi di tmedyazt-is, sakayen-t wid yețțsen, wid umi qqnen-t wallen γef iεedda uzaylal d lbațel achal d aseggas. Izen-ines yussa-d srid i wakken ad immel i iqbayliyen amek tamurt ara tecbu timura iteddun γer zdat.
Lwennas meεtub d ameγnas idder deg usirem, ulama ur yehdir ara yenna-yaγ-d si tqacuct n wedrar d akken timetti n iqbayliyen ad tehlu, a tesfed leğruh-is, ad teflali teqbaylit-is!
Lwennas meεtub d amedyaz yecuban lemri n tmetti; iwelleh, iselmed, imeyyez i temsal merra, ayen ihulfa inna-t-id deg isefra-s. Ass-a, iqbayliyen merra d atmaten-is, gulen ur hniten; abrid-is a t-kemlen, asirem-is a t-awden!?
