Ur ǧǧin tamurt, yal amḍiq iwḍen-t, anga yeres uḍar-nsen tluɣ. Zgan ttcetkin, snen ala ilhem s yes-s i d-ttawin ayen i yebɣan. Ɣur-sen sɛan lḥeq ɣas ma yella ḍelmen, win ara ten-isḍelmen ar d at-ččen.
Aqendur acebḥan yuɣalen d aberkan seg ilefḍan, inezḍan iɛreq-asen-d ubrid s wudmawen-nsen, deg uččamar-nsen yeckenteḍ dɣel, ɣer-s i sefḍen lexdayem-nsen, d texnanasin-nsen, tid ur yezmir ula d ciṭṭan ad tent-ixdem. Tacacit ɣef uqaru ammer ahat ad t-id-qsed yiwwas tmusni!
Sserɣen ixxamen, nɣan lwafen, tulawin, imɣaren d wid akk ur nexdim kra. Nɣan imusnawen, inaẓuren d iggad akk i ten-ixulfen… Ur fehmen s wawal, awal ɣer-sen yelha kan i tkerkas. Ala ddreɛ i sexdamen ma d allaɣ ula iwumi ? Nettwali-ten deg umaḍal, nɣan, tarḍiqen sya wesya, serɣayen senaǧeq n tmura isen-ihwan, regmen deg-sen akken i d as-n-ihwa, mi d-netqeḍ s awal ɣef wayen ixedmmen, ik-iɣaḍen, imiren ad yeɣli igenni ɣef tmurt! Ur ilaq ara, d keč ara yuɣalen tḍelmeḍ acku ad k-inin: “tetɛeddaḍ ɣef lḥerma n wemdan »…atg.
Ass-a, nekni i d-yettwalin si berra ur nezmir ara ad nefreẓ ayen yesemgaraden irebraben d yinselmen ! Ahat d tabɣest !. Neḥder, nwala dacu ixedmmen irebraben-inselmen deg umaḍal, wid akken yeqqaren nekni d inselmen ur nqebbel lbaṭel, d tawaɣit ! .
Seg wasmi i d-ilul rrebrab agi, ulac ineslem deg umaḍal i d-yefɣen s abrid, i ɛeggeḍ ad d-yinni “ wigi mačči d inselmen, wigi ur llin nneɣ ! ”. Inselmen ssusumen di lexdayem n irebraben ineqqen s yisem n tineslemt, mi i d-yekker yiwen ad yer ttar ad ireggem ddin-nsen, neɣ ad d-yini “d inselmen i la ineqqen”, inselmen ad kren ɣef tikelt, d amiri ara d- mmiren s iberdan am wakken tetɛeddaḍ ɣef lḥerma-nsen ɣef lḥerma n nbi-nsen, neɣ ahat n Ṛebbi-nsen. yili keč tneḍqeḍ-d kan ɣef tidett.
Arebrab ur yelli kan d win yenɣan, ula d win iwalan yessusem, win yeẓran ur d inṭiq. Ineslem n tidett, ɣef wakken i d-qqaren, d win ara d ineṭqen ɣef lbaṭel, ɣef lekdeb d zzur anda ma yeẓra-t…atg. Anida ddan ihi yinselmen agi n tidett? Imi walan ɛemden, ssusmen:ula d “ Tasusmi d timenna ”.
Nugad ɣef tmurt n iqbayliyen ad tt-id-qesden, deg-s ad zizlen idammen, ad ẓẓun tikta tiberkanin yettefruruxen, ad ẓẓun deg-s tegdi d lbaṭel, ad reǧmen tulawin, ad sgujlen arrac, ad ḥeqren imɣaren d temɣarin, ad rren irgazen d aklan. Nwala-ten, nnessen-iten amek ixedmen ayen akken i ttagin i wiyaḍ. Ur yelli nfeɛ deg win yesazlen idim, deg win yenɣan tutlayin ur yessin. Ma ad tegri tikli neɣ tadukli d win yenɣan? Ma ad tili teḍsa d uḥesses i win yezlan?
Win yeǧǧa wallaɣ, win tɣunza tmusni ad yuɣal fell-aɣ d Nbbi, anger-ik a yul ! Win ara sen-iḥessen yehlek, win ara ten-iḍefren yenza yixef-is. Seg wasmi id d-lulen ar ass-a deg idammen i la ttɛummun, s idammen i la ssiriden. Lukan d abrid n tidett, tilli ma ad mmiren annect-nni n idammen? Lukan yelli d abrid n tayri, tilli ma ad yili wannect-nni n dɣel d lkerh.
Tugdut ɣur-sen d allal i wakken ad awḍen ɣer leḥkem, mi id as-n-tefkiḍ izerfan, ad wten amek ara ksen wid-ik, amek ara nɣen tugdut, ula d azref n tudert ur tqeblen.
Tamurt n Lzzayer tuɣal d dduḥ i tisneslemt, tuɣal d annar anga tturarent tikta tiberkanin. Nettwali deg iberdan, nḥedder i imeslayen n ilmeẓyen, nugad id d-irenun, nugad d cwal i d-iteddun. Ayen yeǧǧa udabu s uɣarbaz, kemlent imesḥaf deg ibardan d leǧwamaɛ…atg. Ma ad yegri umeyyez ma ṭfen-tt ?
