NUR, udem n tafat yeǧǧa-yaɣ

9

I wid ur nessin ara Nur Uld Amara, d aslemad n Tamaziɣt u d ameɣnas ur nɛeyyu ɣef tutlayt-is. Ilul deg taddart At Ssi Amara i d-yezgan deg At Yaḥya, azal n 47 km deg unẓul-asammar n Tizi Wezzu.

Deg 2000, yezger ɣer Fransa anda yeqdec aṭas ɣef tutlayt d yidles Amaziɣ. Deg umedya, yella d amekfadu n yiwet n tesgilt deg tilizri n BRTV, isem-is «Timlilit d Unazur». Annect-a yella-d deg iseggasen imezwura n BRTV. Deg iseggasen-a ineggura yesselḥa daɣen tasgilt nniḍen, isem-is «Timsirin n Tmaziɣt». D tasgilt s wazal-is, imi aṭas n Imaziɣen, ama deg Tmurt neɣ deg Fransa, lemden ilugan n tira n tutlayt n tyematt-nsen.

Nur Uld Amara, yella yeselḥay tasmunt CBF (Association franco-berbère) n Saint-Denis, anda ger leqdicat-is yella yettheggi inelmaden ilmend ukayaḍ n BAC n Tmaziɣt. Yella daɣen ger wid yesseɣtuyen akayad-a.

Send ad yunag Nuṛ ɣer Fransa, deg tmurt-is, yella ger wid iqedcen ugar ɣef tutlayt d yedles Amaziɣ seg wasmi yella d anelmad n tesnawit armi dayen yessuli taɣuri-is. I wid yecfan i uɣunzu aɣerbazan i d-yellan deg 1994, asmi kan awanek neɣ adabu Azzayri yefratt di tikti i wakken ad yilli di tagara unekcum n Tutlayt Tamaziɣt deg unagraw aɣerbazan n Lzzayer, i Wesqamu Unnig n Timuzɣa (H.C.A.), umi yefka Tizziwet (Lewkala) n uheggi n wallalen usegmisen ilmend uselmed n Tmaziɣt.

Dɣa deg 1995, H.C.A. yufrar-d Nuṛ Uld Amara i wakken ad yili ger wid i wulmen ad seɣren Tamaziɣt deg iɣerbazen n tmurt. I wannect-a ad yetteki d wiyaḍ deg Tannant usileɣ n iselmaden n Tmaziɣt i d-yellan deg Ben 3aknun (Lezzayer tamanaɣt).

I wid yecfan i weɣmis Hebdo n Tmurt, deg 2000, Uld Amara yella ger wid yesselḥayen isebtaren n Tamaziɣt n weɣmis-a n Bgayet.
Wiki d kra kan ger waṭas n Leqdicat i d-yettefɣen dima seg ul yeṣfan n Nuṛ Uld Amara ama deg Tmurt neɣ deg Fransa ɣef tutlayt n lejdud-is.

Deg uzeṭṭa n tmetti Facebook anda yettili umbaddel n tektiwin, netta d waṭas n yemeddukal i teɛna Temsalt n tmaziɣt, krad wussan kan uqbel ad yessufeɣ iman-is, ass n 17 Cuṭwembir ɣef 9h02 seg umafus-is, icegɛed izen-a : «{Tamaziɣt, tamaziɣt, tamaziɣt…!!!Ar tufat ay imeddukal}».

Wissen ahat seg umeṭreḥ umuḍin i t-id-yuzen imi yella yehlek aṭan ur nḥellu. Ahat imi yezra belli ad yunag i lebda seg tmeddurt-a i deg nella, d lewṣaya i yebɣa ad aɣ d-yeǧǧ ɣef tin umi yefka aṭas seg tezmert-is d wayen yesɛa.

Ihi seg tama‑nneɣ a Nur, kkes aɣbel izen-ik yewweḍ-aɣ-d srid. Sgunfu di talwit u ttak azul akin-aẓekka i wid i ak‑yezwaren am Dda Lmulud, Dda Busɛud Muḥend Arab, Lwenas Maṭub d wiyaḍ akk i aken‑icban deg umennuɣ ɣef tmaziɣt.

Ad kfuɣ tajmilt-a s wawal n temyarut n tmurt n Legliz, Julie Burchill, i d‑yennan imeslayen-a:
“{Imeṭṭawen tikwal d tiririt ur n-wulmen ara i tmettant. Imi tameddurt tella-d s wudem aṣeḥḥi, d Rrbeḥ, ṭiririt igerzen is ara nqabbel tamettant d azmumeg.}”