Qqaren Tamurt ur tesseččay ara aɣrum !!

7

Aṭas n Yeqbayliyen iwumi sliɣ qqaren “Tamurt-a (tamurt n Yeqbayliyen) tecbeḥ lemmer tesseččay aɣrum”. Aya d akellex, mačči d tidet. Wa d awal i d-iḍegger udabu, Iqbayliyen gren-as iɣallen wer ma faqen, dɣa uɣalen armi yumnen yes-s. Yebɣa ad ɣ-yessimen syes-s i wakken ad neggaǧ, ad nemcuyyar deg yal tamnaḍ n umaḍal, ad d-nelhu kan d weɣrum-nni, taqbaylit-nni ad tt-nettu. D wa kan i iceɣben adabu aεrab-ineslem. Ma yella d tidet tamurt ur tesseččay ara aɣrum, amek ihi i d-ddren Yeqbayliyen armi d tura?! Tili negren seg waṭas-aya. Ma yella ur tesεi ara nnfeε s tidet, d acu ara d-yawin Fransa ad tessentu tuccar-is deg wakal-nneɣ?! Σni d lxir i ɣ-tebɣa neɣ nɣaḍ-itt?!!

D tidet, tamurt tuɣal ur tesseččay ara aɣrum, maca segmi i yuɣalen Yeqbayliyen d ifenyanen, ttarran ifassen-nsen ɣer leǧyub, ttraǧun rrbeḥ deg leqhawi mi ara tturaren dduminu neɣ lkarṭa seg ṣbeḥ ar tameddit..Tuɣal ur tesseččay ara aɣrum segmi nuɣal nettkalay ɣef ddula ad ɣ-d-tejber axeddim.. nettat dɣa lemmer ad taf ad ɣ-tessenger ur ɣ-tettqil ara. Ma yella tkemmel akka, mačči kan d aɣrum ur tesseččay ara, maca kra yellan d yir lεib, ur yellin deg leεwayed-nneɣ, ad d-yennulfu deg-s. Dɣa atan aṭas i d-yennulfan yakan: am tmenɣiwt n yiman, tikkerḍa, timegraḍ..atg.

Zik, mi ara d-tεeddiḍ ɣef wezniq n taddart, meḥsub ur d-tettafeḍ ula yiwen, imdanen yakk xeddmen deg tferkiwin-nsen. Win i ineqqcen ineqqec, win i yettmeyyilen yettmeyyil, win ikessen ikess.. lḥaṣun yal yiwen d acu i ixeddem. Ttawin-d yakk aɣrum-nsen i d-ḥellan s tidi-nsen. Ass-a, ilmeẓyen ttmenṭaren deg yizenqan n taddart, ifassen deg leǧyub, stufan-d i yir awal d tmeslayt ɣef wihi d tihin.. neɣ ttargun ad uɣalen d imerkanṭiyen s tɣimit sufella n yeẓra n tejmaεt. Ma d iḥerqan dayen buren. Lemmer ad d-kkren wat-zik, ad d-afen akal iɣef ttnaɣen ɣef terdast deg-s, iɣef skarayen imenɣi ɣef tlisa, deg liḥala ideg yella akka tura, ad ten-d-run d iɣeẓrawen.

Ilmeẓyen-nneɣ ḥeqqren axeddim n wat zik, qqaren ulac deg-s nnfeε. Qqaren daɣen tudert ass-a tenbeddal, imi ttwalin, deg tilivizyuwat n tmura, ilmeẓyen yakk ttlusun akken i iwata, zzin-asent-id teḥdayin merra cebḥent, tessen afenǧal-nni n lqahwa neɣ tabiyyirt-nni tasemmaṭ. Wiisen dɣa ma yella akka s tidet i bennunt tmura?! Wissen ma s tidet axeddim n wat zik ulac deg-s rrbeḥ?!
Aya d akellex, d tarewla ɣef tidet. Ulac axeddim ur nesεi rrbeḥ. Γef aya, ur yessefk ad yeḥqer wemdan axeddim n wayeḍ, akken yebɣu yili. Ixeddimen yakk s ccan-nsen. Ilmeẓyen-nneɣ ɣilen-as, d amedya, ma yella kerrzen taferka-nsen neɣ kessen lmal d leqder-nsen i yeɣlin. Am akken zeεma, ur ṭṭifen ara amkan εlayen deg tmetti. Maca tuget deg-sen ur ẓrin ara rrbeḥ i yellan deg ixeddimen-a i ḥeqqren akka, am tkessawt, uẓu n ṭjur, tibḥirin… tafellaḥt sumata d wayen d-xeddmen wat zik s ifassen-nsen.

Eyyaw ad d-neddmet amedya n tkessawt n tɣeṭṭen, ad d-nḥesbet d acu n tedrimt i tezmer ad d-tawi. Ad negt leḥsab ɣef 25 kan n tɣeṭṭen. Muqlet ihi:

• Taɣaṭ n Spenyul i ɣlayen deg tmurt txeddem 30 000 DA (305 euro). Ihi 25 n tɣeṭṭen ad tent-id-naɣ s 750 000 DA (7 625 euro)

• Taɣaṭ ur d-nettak ara yakk, deg wass ad ɣ-d-teẓẓeg 03 litrat uyefki. Wa ma nkess-itt akken ttkessen wat zik, mebla ma nefka-yas učči i s-ilaqen.

• Llitra uyefki n taɣaṭ da deg tmurt txeddem 70 DA (0.71 euro)

• Ihi deg wass, yal taɣaṭ ad ɣ-d-tettawi deg wass 210 DA ( 2.13 euro). Deg waggur 6300 DA (64,04 euros). Deg 09 wagguren (acku ad nekkes ussan ideg ara teɣri) ad ɣ-d-tawi 56700 DA (576.27 euros).

• 25 n tɣeṭṭen, ihi, ad ɣ-d-awint deg useggas 1417500 DA (14406 euros), wer ma neḥseb iɣiden d tɣiḍaṭ ara d-arwent.

I tura, tamurt ur tesseččay ara aɣrum?!!