Remḍan deg tmurt n Yeqbayliyen

9

Awwah, qqaren kan d ayyur n tegmat, d …, ur cukkeɣ ara ! Amek akka tura ara yiẓumm igellil, d acu ara yečč ma ara tedden neɣ i sḥur ? Acku imzenza, aṭas deg-sen yettrağun ayyur-agi i wakken ad d-ssufɣen taccarin-nnsen s tmerna n ssuma i yal asafar. Aεağaba ! Tekker ddunit ɣer laxert, mmarent-d tlufa ɣef Uqbayli am ubruri. Amzun akken drus fad, laẓ akked tmess…

Ula d isufar n wučči tuɣ deg-sen tmes, ulin ɣer tesεa-u-tesεin!

Win mi ara tinniḍ kilu n weksum yewweḍ 900 DA, udi s 600 DA, zzbib s 450 DA, tiskert s 500 DA, zzlabiya s 200 DA… Ad yesxinfer am tfeɣwet ! Maca annect-agi yekka-d sɣur udabu ur d-necliε deg useddu n tnezzut, yeεdez ad ixeṭṭi imzenza yesserwaten akken i sen-yehwa ! Rnu amdegger d udemmer i waken a k-id-isiḥ weɣrum neɣ uyefki…

Akka i d tudert n Weqbayli deg aggur n Remḍan, yal taɣawsa tuli di ssuma, anagar tajernaṭ n uxeddam i yeqqimen akken d tameɣbunt.

Ar melmi ara tdum liḥala am ta? D acu i d-iheyya udabu zdat ubaxix-ayi?

Adabu ur d-yenni zzant wala rɣant. Am akken ur d-ḍrint ! Adabu yefnat-id zzux i wakken yesken agdud ur t-ixus wayra. Yewwi-d aksum si Lhend, a d-yesqam s 250 idinaren i kilu?

Ma d Iqbayliyen msakit, rnan asen-d ɣef acu ara sṭuqten awal: wa yessalay leḥsab acḥal n kilwat i yezmer ad yečč, wayeḍ iḥesseb acḥal n kilwat i yesruḥ deg iseggasen yezrin akken a ten-d iɣrem… tagara leḥsab-nni merra yexser! Acku at iččumar nnan-d aksum-agi ur yeḥlil ara. U yerna imdanen merra ikecm-iten ccek deg weksum yeggaren ɣer Sbiṭar. Lḥasun d ṭmeε i yessuzlen amɣar. Ziɣ ar tura mazal wid yettamnen s tkerkas i d-yettawi yal tikelt udabu. Yak d trafik i ten-id-yecqan !

Deg ayyur-agi n Remḍan, inselmen ttun lislam: Ulac win ara a d-imektin igellil. Adabu mazal yexmet am uccen yettrağu… Lemmer yehda rebbi iqbayliyen tili aṭas-aya i tefra temsalt-ayi, yili texsi tmess i iceεlen deg yisufar, yili tebna tmurt n Yeqbayliyen ɣef wezref d tegmat, yili yal Aqbayli ad yidir tudert n liser di tmurt n lejdud !