Sɛid At Mɛemmer amɣar azemni atrar

3

S usefru iɣ-d-yesmuḥyet tamacahutt. S cbaḥa n walal i aɣ-yezzuɣer ɣer telqay n unamek.

Mačči ass-a i d-yennulfa, tesnemt akk, isem-is Sɛid At Mɛemmer. Ildi-d allen-is i tkelt tamezwarut di taddart n At Meslayen ass n 9 di yunyu, aseggas n 1966 di Tmurt n Yiqbayliyen.

Tameẓẓuγt-is seg wasmi yella meẓẓi ar ass-a tezga twelleh s ayen d-yeqqar Mass Messus, ulac melmi yesserfa Beẓẓi bu lkuca, wala dadda-twen Meṛẓi. Daγ netta d leḥdaqa-yagi-ines yakk i tyeğğan yedder ar ass-a ideg d awen-d-yura adlis-agi nwen, i kenwi kan, ay arrac-nneγ.

Ma ur tuminem ara yakk annect-a, ad ternum kan akka cwiṭ, ad timγurem, imiren ad ssgemḍent wallen-nwen akka acemma, a d temlilem Ameẓyan Kezzar, bu weγyul-nni n Ğanğis, steqsit-tt!

Ma yella qqdent wallen-nwen, ma yella ifud wallaɣ-nwen tzemrem ad tarzum s asxerbubec-ines deg-s ad tafem tala n tmusni, tisit seg-s ad tili ala i kenwi, acku akken iqqaren wat zik “win ifuden, yeffi-d!”

Tikli-s di tira ur taḥbis ara kan da, yebɛed wansi i d-yusa, yebɛed s anda i teddu, daddat-wen Sɛid! Di tikli-nwen, nadit ula d kenwi ɣef Wakli Aezwaw i iḥeḍren i “yimeṭṭi n bab idurar” amek it-id-yerra d asefru ɣezifen am teɣzi n targit-is akked yeswi n Sɛid: asǧǧuǧeg n teqbaylit.

Sɛid iseqreb-awen-d tamusni i wakken ad teẓrem kra seg wayen yura Brecht, Kafka, Heine, Hesse, Mann… ad tafem yesmuḥyet-it-id ɣer teqbaylit.

Deg unadi-nwen i wakken ad tissinem amdan, ur yebɛid ara fell-awen, ur yezmir ara ad awen-yaɛreq ma yella teɣram “Ungalmezgun” ! Ur iban ma d ungal neɣ d amezgun. Akka i as-iga isem! Anida ara t-afem?

Iḥeqqa ttuɣ ur wen-d-nniɣ ara, “Ungalmezgun-agi” mazal ur d yeffiɣ ara, maca ur yettɛeṭil ara ad d-yeffeɣ akken daɣen ara d-fɣen wiyaḍ am “ wamud n tullisin” d “ wamud nniḍen deg-s 400 n isefra. Adlis n yinnan (isefra imecṭaḥ, ɣer waya yerna-d “tisnimirin” (Chroniques).

Imifat tellam seg wid iḥarcen, yeṭṭurcen iban teslam s watmaten Grimm? Teslam s tmucuha-nsen, yellan d lsas n tsekla, twalam amek i d-zzint i umaḍal, amek i kecment di tmettiyin, sedhant, rebbant igerdan yellan deg umaḍal.

Ihi daddat-wen Sɛid At Mɛemmer yerra-yawen-d ɣer teqbaylit 13 si tmucuha yagi n watmaten Grimm, i wakken ad yili, ula d kenwi, wayen ara terrem ɣer ddaw tuɛlect, ad awen-yesselmed yes-sent amek ara timɣurem, ara tesmeɣrem tirga-nwen. Deg wamud-agi ad tafem daɣen timucuha nniḍen i d-yerra ɣer tutlayt n Muḥend Uyeḥya, am tid n Asrid Lindgren akked tiyaḍ nniḍen.

Ma d amaynut d-yefɣen ddurt-a d tid-ak n Warek d Wasin! Ahaqel ur ten-teɛqilem ara d anwi-ten sin yemcumen-agi? Wigi ihi d Max d Moritz at txidas d tmurdas, iselben madden d tirni. D taneggarut n Sɛid d-yefɣen ɣer teẓrigin Lulu.com, i awen-d yelqeḍ abrid-a si tutlayt n Heinrich Christian Wilhelm Busch.

Ilaq kan ad teẓrem belli Sɛid yaxḍa tixidas, mačči d win d-yettawin tid-ak n “uɛeqqa n yired yesnen acrured!” Maca seg wid iḥemmlen tigzi akked tiḥerci, uḥdiqen akka am kenwi, yettmeyyizen i wayen iteggen. Ɣur-wat ihi ad taɣem abrid n Warek d Wasin, ad ken-ttwalin madden s tebrek n tiṭ, mawel ad tɛeddim ula d kenwi di tessirt.

Ad awen-iselmad belli d ayen ara tgem taṣebḥit ara tmegrem tameddit. Ddut-d ihi yid-s ad awen-yini: “Abbaḥ! Ayagi diri-t!” Acku, win ixeddmen deg wayen n dir, dulqrar “fell-as ad d-tezzi tmeddit!” Hemma! ihi “ay arrac, a yimurac, a tiqerray n yemcac!” Timucuha n Sɛid am teftilin ara reqqent deg wallaɣen-nwen.

http://www.lulu.com/shop/s%CE%B5id-at-m%CE%B5emmer/warek-d-wasin/paperback/product-20739852.html