Tamsulta tafransist tettsuɣu ɣef Uqbayli s taεrabt !!!

1

Yiwen unelmad aqbayli deg Montpelier di Fransa yura-yaɣ-d ɣef lbaṭel i s-yeḍran iḍelli deg yiḍ sɣur temsulta. Atan d acu i ɣ-d-yenna :
Aya yebda-d imi yella deg tmacint. Usan-d ɣur-s yimsulta, ttsuɣun fell-as s taεrabt « ara kwaɣṭek ! Aḥbaṭ! » (Awi-d lekwaɣeḍ-ik ! Ṣubb seg tmacint !). Irumiyen i yellan dinna, wehmen deg wayen llan ttwalin. Akken I d-yenna reggmen-as ad cehhden mgal lbaṭṭel n temsulta-a, dɣa llan ula d wid i d-yeddmen imafusen-nsen, ṭṭfen-d tiwlafin n temsulta-a.
Ikemmel yenna-k, d lemziya, ɣur-s yakk lekwaɣeḍ (lpaspur, lkarta n tmezduɣt, tin unelmad, tin n usenkid akked tin n tmacint), acemma ur t-ixuṣṣ. Maca ɣas akken, amsulti-nni aεrab yewweḍ almi i s-yenna “tawlaft i yellan deg nnekwa-k mačči d ayla-k.” Ṭtfen-t dinna azal n 2 timar (swayeε). Yenna-d daɣen belli semmus (05) n yimsebriden ḥebsen-d, wehmen deg wayen ttwalin, dɣa ssutren-as ad sen-d-yefk uṭṭun-is n tilifun i wakken ad cehhden ula d nutni mgal lbaṭṭel-a. Almi d ttnaṣfa n yiḍ sumek i sen-d-yewweḍ isali i wid i t-yeṭṭfen belli aqcic ulac d acu i s-d-ssuksen, dɣa serrḥen-as-d.
Anelmad-a yenna-k atan deg yir liḥala. Dɣa tasebḥit-a, ur yessaweḍ ara ad yesres allaɣ-is deg ukayad i yesεedda, imi ayen yeḍran yid-s deg yiḍ yeǧǧa-yas-d ccama. Yenna-k d acu i t-iqerḥen yak d imi s-d-yemmeslay umsulti s taεrabt. Dɣa yesteqsay “ma yella amsulta-a ɣur-s azref ad s-d-yemmeslay s taεrabt, ur yellin d tutlayt-is?”.

Wissen melmi ara tekfu tallit anda iberraniyen ur ttarran ara Iqbayliyen d Aεraben?!!