Tanemmirt a mass Ban Ki-moon!

5

FRANKFURT  AM MAIN (Tamurt) – Ass n 05.03.2016 mlaleɣ sin imaziɣen irifiyen di Frankfurt am Main, nniɣ-asen: «Azul fell-awen ay Imaziɣen». Yiwen deg-sen yeḍsa, ma d wi ssin yenna-yi-d: «Hadi luɣat lḥayawan, Ixes a ad tiniḍ «Salam alikum».

Nekk ssusmeɣ, dɣa kemmleɣ abrid-iw. Tedduɣ abrid abrid allaɣ-iw irekkem, ul-iw yedderduf. Nniɣ deg yiman-iw: «Ẓer tura i rregmat-a! Uɣaleɣ nniɣ d yiman-iw: «Ula di tmurt-nneɣ «Tamazɣa talemmast» mazal ar ass-a llan daɣen yad ur neḥemmel awal «Azul».

D acu kan iseggasen-a ineggura awal-a «Azul» yessaɣ iẓuran di tmurt-nneɣ. Anida yedda yiwen a s-isel. Win yeqqaren (tin yeqqaren) azul ira ad yini s wakka i medden: Ula d netta ɣur-s tutlayt, yezmer ad izux s yes-s

Awal-a «Azul» yeffeɣ-d ass n 07.03.2016 ula seg yimi n umaray n tmura n umaḍal yeddukkeln mass Ban Ki-moon di Dzayer tamanaɣt. Mass Ban Ki-moon yenna i uneɣlaf amezwaru n Dzayer: «Azul fell-ak». Awal-a yeffeɣ-d am tersast ur yettuɣal ara ɣer deffir. Aneɣlaf amezwaru n Dzayer ur t-iruja ara seg yimi n mass Ban Ki-moon.

Ihi awal „Azul“ mačči d awal kan. Awal-a yefka-yas mass Ban Ki-moon azal asertit. S wawal-a mass Ban Ki-moon ira a d yini i udabu adzayri: Ula d imaziɣen ɣur-sen azref ad ddren s tutlayt-nsen. Tanemmirt a mass Ban Ki-moon!

Tiɣri-nneɣ nekni s yezwawen i mass Ban Ki-moon:

Tutlayt-nneɣ nettazzal a tt-naru di yal amḍiq di tmurt-nneɣ. Tutlayt-nneɣ mačči kan d awal „azul“ i tesɛa. Ɣur-neɣ tugdut, nettqaḍar izerfan n wemdan.

Nekni s Yezwawen nettazzal i wakken a nettekmanday di tmurt-nneɣ nekni

s yiman-nneɣ, a naru s tutlayt-nneɣ, a nedder d aɣref am nekni am iɣerfan

n tmura n umaḍal. Nessaram teẓriḍ annect-a d azref n yal aɣref.

Aql-aɣ nettraju afus s ɣur-k a mass Ban Ki-moon!

Sɣur Akli Azwaw