[taq]Awal amezwaru[fr]Premier Editorial[en]Kabylia Bound to autonomy[de]Ersten Leitartikel

1

Yennayer d azamul n tnekkit i wid mazal ṭṭfen deg wansayen d-ǧǧan imezwura. Ur ṭṭuqten ara yizamulen t-yecban di tegnit i deg d-negra, neɣ ma llan, a ten-id-naf ur sen-yettunefk ara wazal i uklalen. Ssebbat i ɣ-yeǧǧan nettbin-d ass-a amzun nekka-d mgal agama ṭṭuqtent, imi akka i tt-ira umecwar d-nelḥa deg umezruy. ‘Tikwin’ nneɣ ɣer temsalt n tnekkit n melmi-tt kan, maca daɣen ddeqs i nezzi nenneḍ seg yimir-en. Γas akken, ass-a {abrid labud neεqel-it}, d win i deg lḥan yelmeẓyen n tseddawiyin n Tmurt ass-agi umenzu n Yennayer. Annect bɣun nudan ad ḥewṣen tisutwin d-yettnekkaren, anect bɣun sslemden-asen taɛrabt di lakulat d tesdawiyin, anect bɣun ččuren-asen iɣmisen d wallalen n telɣut d ttikerkas n tesnakta taɛrabt tasnislemt…tuffɣa-nnsen ɣer iberdan akken a d-suɣen: “NEBΓA A NIDIR S TNEKKIT NNEΓ DEG WAYLA NNEΓ”, d abeqqa i yal wid ur negzi d akken tikli n wemdan ɣer tlelli-s yiwen ur tt-iḥebbes.

Win yukin s tnekkit-is, yessaɛezzay izamulen n tnekkit-nni. Tutlayt taqbaylit i d-yeqqimen d ttinigit, d ttamuddurt i d assaɣ nneɣ agejdan d yiẓuran. Ihi deg webrid n tikwin, yessefk ass-a a tt-neḥrez ma nra a neṭṭef di tnekkit-nneɣ, a tt-nesseqdec di yal annar n tmeddurt ma nra ur nettidir ara ddaw tacḍaḍt n wiyaḍ. Tiɣri umussu n Timanit i weɣref aqbayli i lmend n useqdec n tutlayt taqbaylit di yal annar n tmeddurt d ayen yettaken asirem i tlalit nneɣ tis snat. Akken d-nenna, ssebat i ɣ-yeǧǧan di tegnit i deg nella ṭṭuqtent, maca tin i ɣ-tent-imekknen ugar d ttutlayt i nettawi deg yimawen kan war ma nura-tt. Anect i neqqim d ilelliyen, nedder s wansayen nneɣ deg unagraw nneɣ ulac deg-s n uɣilif; maca tameddurt deg umaḍal n wass-a i wumi ttwakksent tlisa s wallalen imaynuten n telɣut ur tesɛi aḥebber! Ihi am nekni am iɣerfan umaḍal, tewwi-d a nidir s tnekkit nneɣ d ttutlayt nneɣ akken yiwen ur ɣ-irekkeḍ.

Iswi agejdan n weɣmis nneɣ s teqbaylit d anegmu n tutlayt nneɣ s webrid agi n telɣut imi aɣmis d allal i yess nezmer a nemmeslay ɣef yal annar n tmeddurt. Tin ɣer-s, imi akken neẓra taɣuri fessuset ɣef tira, nessaram ad yili daɣen d allal i deg ara izmiren ad lemden yeqbayliyen tira n tutlayt nnsen. Dɣa nwala d akken qqlen kra ttarun segmi i d-yennulfa facebook! Ugar n waya, nettheyyi-d timsirin ara yilin deg weḥric “Tutlayt” akk d yeḍriṣen d tidiwenniyin n imussnawen n wannar-a. Ihi rezzu-d ɣer tamurt.info ay Aqbayli i wakken a teɣɣareḍ u a tettaruḍ tutlayt-ik! Yennayer-ik d ameggaz!