Tasertit deg tmedyazt taqbaylit

6
Ayen yakk i d-nniɣ
Fehmet a medden
Mačči ɣef tin bɣiɣ
I kfan ifadden
Xas la d-ttmesliɣ
D ayen akk nniḍen
Deg ul-iw ẓriɣ
D acu i d i-iqerḥen

Deg yiseggasen n 70, tamdyazt teqbaylit, tebda tetteffeɣ i unar n tguni deg akken teglugel tettel acḥal n lesnin yakkan. Aya yella-d s lmendad n imedyazen i d-yegren ɣer reḥba n tira akked n tesekla am Ben Muḥemmed, Ferhat Imaziɣen Imula, Yidir, At Mengellat, uɣur ara d-yernu ar deqqal Maεṭub Lwennas, Malika Dumran, Weεzib Muḥend Akli, Σmer Qebbi, Muḥya d waṭas nniḍen. Lunis netta yebda anekcum ɣer ugni n tmedyazt tasertit s leḥder anwa ur necfi ara i tizlatin-is « aεeṭṭar, semmeḥt-as ɣef ayen d-yenna». Maεlum i tazwara lebni n yisefra icudden ɣer tsertit yella s lemεun akked d lemtul. Imedyazen bdan sakayen agdud ɣef yidles-nsen amaziɣ uɣur εnan waccaren n tatut akken ad t-gezren s leḥder imi di tallit-nni ulac tilelli n umeslay. Deg uḥric-agi yenna Ferḥat:

Ɣef leεyun ttmeslayen
Nekni ur neẓri d acu ?
Wissen d timi neɣ d allen
Neɣ dayen nniḍen nettu ?!!
Akit a widen yeṭṭsen
Idles–nneɣ la irekku

Deffir n tiɣri tella-d tiɣri, yuɣal-d ṣṣut si yal tama. Aɣbel yerḥen imedyazen d akken medden ad rren lbal ɣer tutlayt-nsen akked yidles–nsen, yebɣa ad yesebleε lbir n lawan deg uzabuq-ines:

Kem ger teqbayliyin
Yelli-s n tudrin
Ɣef tuyat tbubbeḍ taεkemt
Ilaq ad trebbiḍ mmi-m
Mmel-as tiqdimin
Selmed-as yakk tameslayt
Iles n lejdud ad t-yissin
D idles n tmurt-im
Selmed-it uqbel ad kem-ifat

Nnig waya-gi, yella diɣ uleqqem n usirem deg ulawen n yemdanen, i wakken xas tettban tegnit teṣεeb, iberdan ssawnen, ur berrun ara i leqrar, ur ttaysen ara. Yenna Lunis :

Urgaɣ am akken d ṣseḥ
Assa mačci am yiḍelli
Urgaɣ am akken d ṣṣeḥ
Ḥeḍreɣ i udrar yuki
Urgaɣ am akken d ṣseḥ
Agris i t-yedlen yefsi

Yelḥa lhal yuzzel wawal, iseggasen ssawalen i wayen nniḍen. Deg yisaggasen n tmanyin iban-d belli ilaq awal ad yini ayen yellan, ad yeskfel lbaṭṭel i d-yeɣlin ɣef tmaziɣt, ilaq timadit n ugdud ad ttubeεzeq am wakken id as yenna umedyaz :

Abeḥri n tlelli
Xas ṣuḍ-d fell-i
Yid-k awi-yi
D abrid n lεali
Jeddi d Amaziɣ
Nekk d Amziɣ
D Amaziɣ ddreɣ
D Amaziɣ ara mmteɣ

Abrid n tegrewla yenǧer metwal tilin n tmaziɣt akken ad tesεu amkan deg tmurt-is, abeεda mi d-teḍra tadyant n yibrir 1980. Tugdi yenquqel lsas-is, xemsa ttwaksen-tt ɣef yimi, Maεṭub ur yedduri kra:

Xas ḥerren-iyi rebεa leḥyuḍ
Xas lfinga ad tt-ttwaliɣ
Xas lḥif ad iyi-d-iṣuḍ
Xas yecceḍ ubrid ara awiɣ
Ma nnan-iyi-d s anda tleḥuḍ
Ad asen-iniɣ nekk d Amaziɣ

Ẓrubat d ifergan n lxuf ttwaksen , yeɣli uɛled n ukukuru, terɣa tattalt n ustehzi, awal yeǧǧa-d timejjatin, yuɣal umyag n teqbaylit yettmal-d ayen yellan mebla tuzya d tunnḍa. Ulac tamsalt icudden ɣer umzruy-nneɣ, ɣer tsertit, yeǧǧa akken mebɣir ma iεebba-t. Kra yeḍran neɣ i d-iḍerrun, tamdyazt n teqbaylit terra tamwat ɣur-s, ur teǧǧi ara ad iεeddi kan akka mebɣir ma yeẓra ugdud s wannect-nni. Yenna Lunis:

Amacahu
Ɣef udrar mi d yerra ṣṣut
Lhiba-s tewweḍ-d arraw-is
Amacahu
S idmaren i ttqabalen lmut
Seεerqen i uεdaw later-is
I tneggarut
Amek ara yefru ssuq-is ?
Weṣṣan si zik
Ɣef temεict n daw uḍar
Akken aneggaru ad d-yer ttar !

Ger yiberdan yessawnen yessan d isennanen, ala s udem n temdayazt i yenquqel uɣrab n tguni. Ala s walal i yettwakkes ukraf n wallaɣ d tidderɣelt n wallen. Ala ttawil n tmedyazt i yellan d allal akken agdud ad iẓer acu i d as-d-ttheggin wussan. Yuɣ lḥal lebni n tmedyazt teqbaylit tasertit ur d-yusi ara kan akka, imi yella-as d llsas Sliman Σzem i d–inebbhen si zik ɣef wannect-a :

Teẓram yakk a Leqbayel
Anwi i d mmi-s n lasel
D win yettḥezziben i nnif-is
Lukan nemǧaza neεdel
Rray-nneɣ ad yeddukkel
Kul wa ad s–id-yeḍher umur-is
Ma nettεemmid i lbaṭṭel
Ad nuɣal yakk am ṭbel
Kul wa ad iheggi aεrur-is