Tavratt n usmekti n gma n tasa Lwennas Matub

3

 

Cfiɣ am assa , mi k id emlaleɣ yiwen wevrid kan, deg yiwen usarag ɣef tmaziɣt. Nnan i y id wid i yesvedden asarag nni, imi tesliḍ ad ttikkiɣ, segmi teɣriḍ idlisen iw, tevɣiḍ ad i yi d tiniḍ kra n wawalen. Ass nni tvaneḍ tettesteḥḥiḍ ayen din , armi ula d nek ggugmeɣ.

A y ass amervuḥ n 24 di Yennayer 1956 i deg i d tluleḍ, a gma Lwenas MATUB, di taddert n Tewrirt n Musa Waɛmar.

I lmend n lḥif i yenγan iqvayliyen sumata, seggwasmi i d tekcem Fransa d iserdasen is γer Tmurt n Iqvayliyen, aseggwas amcum n 1857, vava k am ivavaten niḍen yunag γer tmurt n Fransa deg useggwas n 1946, akken ad yaf axeddim d tedrimt s wayes ara yerfed tawacult is.

A gma Lwenas, trebba k id setti k akw d yemma k taɛzizt, Nna Σaljiya. D nitenti i k id issekren. Di temẓi k tesmeḥsiseḍ as i yemma-k mara d tettawi cnawi nni n zik, ama deg iḍ mara d tezim i ukanun, ama deg uzal mara tili tetmahal di lexla, tẓeddem d isγaren, neγ tneqqec tivḥirin, am tulawin tiqvayliyin sumata.

Asmi tewweḍeḍ 9 iseggwasen di lεemr ik, txedmeḍ adinan neɣ tagitart ik amezwaru s uvidun n zit n tkerust akw d lxiḍ . S yis i d tecniḍ « A Madame servi latay » yelan imiren mechuret. Xas akken tkecmeḍ s aɣervaz n Yemṛavḍen iṛumyen, maca aɣervaz yusa y ak d amzun d lḥevs.

Tesmenyifeḍ ad tesrusuyeḍ tixfet i yefrax, neγ ad tesmuquleḍ di tlawin i yetmahalen di lexlawi. Maca teriḍ asen tajmilt i yemṛavḍen agi urumi, s tin n lεez d lḥarma. Am keč am wiyaḍ, deg uɣervaz agi n sen i tevdiḍ tetnadiḍ ɣef yedles amazigh, ansi i d nekka, dacu i d amezruy nneγ.

Dinna i tḥuseḍ akken iwata aẓar ik d aqvayli.

Asmi yefra tṛad mgal Fransa, tḥusseḍ am akken aselmed n taɛravt deg umkan n tmaziγt-taqvaylit d AΓURRU ! Si trad nni 1963-64 ger iqvayliyen d udavu azayri, tkerheḍ taɛravt amzun d qeḍran, acku teḥsiḍ d tameslayt agi i yak yeksen tutlay ik taqvaylit. Dɣa cwit akka tetaxreḍ d deg uγervaz, tevdiḍ tlemdeḍ s yiman ik.

Tezgiḍ teqqareḍ i medden : Ayen akw teseneḍ, tlemdeḍ t di temẓi k taleqaqt, sɣur seti k akw d yemma k, ama d timucuha, ama d cnawi uhuzu n lufanat, ama d inzan, timseɛraq neɣ isefra.

Asmi i d tusiḍ γer Fransa deg useggawas 1978, am icenayen iqvayliyen deg ukud nni, tcennuḍ di leqhawi, acku dina i d etmektin iminigen tamurt taqvaylit, acku aṭas deg sen ǧan tilawin d waraw n sen di tmurt. Tenniḍ, dina i d emlaleḍ d ucenay niḍen Yidir. Ladɣa d neta i k iɛawnen akken ad d tesufeɣeḍ aḍevsi k amezwaru, « A y izem »

Deg useggwas n 1980, teskecmeḍ akken iwata tasertit di cnawi k. Imiren i tebbeɛzeq tefsut imaziγenn 80. Akken a d tesekeneḍ tamestla i nek i tmeskanin i iḍeṛrun di tmurt n iqvayliyen, tuliḍ γer usayes n Olympia, s levsa n iserdasen, acku tevγiḍ ad d weriḍ tamurt n iqvayliyen tekcem di trad. Atas n wussan i teqim Tzeqqa n Olympia tečur armi d imi.

Deg useggwas n 1981 tesufγeḍ d tizlit « Yeḥzen Lwad Aɛisi » i deg tjemεeḍ akw timsal yeḍran deg useggwas n 80. Ma yela di tmurt izayriyen, ewten fel ak neḥ, ur d tεeddiḍ ara ama di Radio ama di Tilizri.

Deg usggwas n 1988, yela t-tedduḍ deg uvrid n Micli /Ain El Hamam akw d sin inelmaden, akken ad twezεem tiwreqtin ara yenecden iqvayliyen akken ad gen sin wusan n usunded i lmend n tmasla d imeskanen n Lzayer tamanaγt. As nni amcum, sqatɛen awen-d ijadarmiyen deg wevrid yetawin ar Micli. Ma d sin inelmaden nni cudden asen ifasen n sen, ma yela d keč a Lwenas, yewwet ik yiwen ujadarmi aεrav aḥraymi s 5 terṣasin n kalac, seg udem ar wudem. Ass nni qesden ad k enɣen. Imi ḥudden k ṣelaḥ igawawen d Jeddi Mangelat, teweteḍ sin iseggwasen di sviṭar d wamek tejiḍ. Maca ayagi yeǧa y ak d cwami.

Kra iseggwasen akken, as n 25 di ctember 1994, teliḍ akw d imeddukkal ik, di lqahwa deg yiwet n taddert, teḥkiḍ d ẓedmen d fel ak irevraven, wwin k ɣer teẓgi , ḥevsen k dina azal n 15 n wusan.

Asmi i d tselkeḍ, teḥkiḍ d sɛeddan k di cṛaε ineslem, ḥetmen fel ak s lmut imi i teqqareḍ « NEK UR LLIΓ D AΣRAV, ΓURI AZREF UR TTILIΓ D INESLEM ». Segmi tamurt n iqvayliyen tekker tenhewwal, uɣalen serḥen ak id.

Ma yela d ass amcum n 25 di yunyu 1998, lejwahi n lweḥda u ɛecra (13h10) zweren ak d iserdasen ixeddaɛen ufiren, deg uvrid ger Tizi Ouzou d At Dwala. ran iman n sen d revrav. Telliḍ t-tedduḍ akw d tmeṭṭut ik d yestma-s s axam ik di taddert n Tewrir Musa, smaren 78 terṣaṣin γef tkeṛṛust ik, ewten k id s wazal n 5 terṣaṣin. Deg wakken i d-iḍan ifuḥanen, sufɣen k id si tkerṛust ik, smaren ak snat terṣaṣin yiwet s uli ik tayeḍ s aqeru y ik.

Yewweḍ lexvar imiren ɣer tudrin, ilmeẓyen iqvayliyen faqen ansi d ekkant akw tyitwin, effeɣen d s izenqan tɛeggiḍen: « POUVOIR ASSASSIN! POUVOIR ASSASSIN! »

Azal n krad wusan, tamurt n iqvayliyen tenhewwal, nneɣlent d tudrin γer taddert ik ad ɛiwzen ɣef YIZEM AΓILAS. Tetwaneḍleḍ ass n 28 di yunyu refden k igiman d igiman n iqvayliyen . Ar assa n wussan, ttruḥun d igiman ttzuṛun d aẓekka k !

UR YEZMIR YIWEN AD K YETTU A GMA LWENAS !

ASSA XAS GEN DI TALWIT !

ASSA TAGDUDA NNI TAQVAYLIT I TETTMENNIḌ ASMI TEQQAREḌ « IL FAUT UNE

REPUBLIQUE KABYLE » LA TTVENNUN YEQVAYLIYEN YESSULIN DI YAL TIΓILT DI YAL TADDERT ANAY AQVALY.

3 COMMENTS

  1. azul, zzgan mi d yekker wergaz deg nneγ ad azlen a t-nγen, maca Lwennas Maṭub xas iγav af allen, neccfa af awal is, tiktiwin is deg usefru kecment allaγ, yessken aγ-id avrid yessuffuγen timmunent i tmurt n Yeqvayliyen

LEAVE A REPLY

Please enter your comment!
Please enter your name here