Telha tiyita uzedduz deg iqerra n widen yugin annuz !

2
272

Akka di tmurt‑nneɣ dɣa, ger tiyita n udebbuz akked dderz n yemsulṭa, yefɣed Mass Ɛabedelḥamid Mehri s yiwet n « tebratt yeldin » i « gma-s aselway » Ɛabed Lɛaziz Butefliqa. Di tilawt ur yelli win yugin tagmatt ger yemdanen. Awi-d ad tili ! Maca ger ayen nebɣa d wayen yellan d izumal n twuɣa i yezrin ɣef wakal n tmurt d ulawen n yemdanen. Anda-t ubrid yettawin ɣer tagmet neɣ ɣer teflest mti adabu yesbededd azal n 30 000 n yimsulṭa akken ad qezmen 1000 n imesbaniyen i d-yussan s ifassen d ilmawen akken ad lḥun deg iberdan n Lẓẓayer tamannaɣt ?

Si leɛḍil ad taweḍ tebratt n Mass Mehri win teɛna, mazal ad ḍrun ibaxixen. Mazal ad azlen iɣilifen ɣef inyiren n yemdanen ur nuklal. Leǧwab nurǧa , mi akken i d‑yusa yesnerna tazayt ɣef ixfan, imdanen slan i usuɣu : « ulac tikli di Lẓẓayer ulac ! » . Tidett tcerreg tasusmi : Yelha udebbuz ɣef iqerra n widen yugin annuz !

Ger ackal d wayeḍ yettili-d umeǧǧed. Yettili‑d kra yettijjiqen amer ad icebel tagnit yesburren guggam. Si tama‑nniḍen di teswiɛt n ddiq wa yerwel wa yettekka. Tasusmi d yiwen udem yeǧǧan abrid i uɛemed. Akka di tagara‑agi akabar n FFS yesmenyaf wer lmentaq ɣef tilin deg wannar n yimenɣi ɣef izerfan. Imeɣnasen yettawin akabar deg ul‑nsen gguman ad fehmen acimi yuɣal ukabar n tirni n iɣallen inemlayen d win yesbelɛen iles-is yeɣɣunza awal?

Deg akken ur d‑tuɣal leɛnaya, d Jamel Zennati i d‑yellan di lmendad akken ad yessiwel i usbeddi n ugraw aɣelnaw n tenmegla amer ad dduklent tuyat akken ad qezment acqirrew i d‑tger teswiɛt s annar n tsertit. Maca di leɛḍil ad temlil tikti n Jamel Zenati d yergazen d imeɣnasen ara tt-iɛebbin ad d-yili wayen ara d-yilin, ad d-yeḍru wayen ara d-yeḍrun. Akka ziɣ di Ben Ɛeknun d inelmaden i yurǧa udebbuz . Teḍra yidsen am widen i yeḍfer wawal : « ccah a yiwen ifuḥen, a d twaliḍ yemmat yemma-k, yak d kečč id tt-id yebden ! ». Tiyita tḥuza tifekkiwin tileqqaqin di lawan deg imezdaɣ n tmannaɣt tazayrit am yal tannumi zzin s wallen akin i ibaxixen tesrusuy Taswiɛt zdat‑nsen, rran iman‑nsen amzun ur slin ur ẓrin. Yak telha tiyita s uzedduz deg iqerra n widen yugin annuz !

Akin ? Acu yellan akin ? Qadafi la ineq, Libya la treq ! Di tiliɣri Seyf n Islam yettgala s nnger, yettsuɣu s lmut ma d bab‑as yesufɣed tuccar‑is. Agemmaḍ leǧnas ssusmen. Yewḥel unẓaḍ deg urekti n talsa. Tafrit ḥuzen-tt iɣisan. Imendyal ɣlin. Ur iban amek i d arazem n taluft . Acu umu zemren cwiṭ -nni n yimeslab yettnaɣen ɣef izerfan n wemdan deg lawan deg timesrifgin ssistiyent rṣaṣ ɣef imeɣben ? Iseɣ ur yesɛi azal zdat riḥa n « les petrodolars ». Akka i d udem n talsa, yettneqlab am tata. Win yenwan yeshel qeḍran ad iruḥ ad yessisen. Ger timuhrit n wigi akked d tugdi n widak, teqimed tidet tefḍeḥ : telha tiyita s uzedduz deg iqerra n widen yugin annuz.

Seg uɣelluy n ṣṣwab ɣer ussegax n usehru yendekwal Mass Husin Ait Aḥmed akken ad d‑yefk asaned i tebratt n Ɛabd El Ḥamid Mehri. Tikwal yeshel maḍi ad dukklent tuyat. Kra n tebratin tseḥḥirent ssufuɣent‑d iles di tsusmi. Maca andat usnad n Ait Ahmed i wiyaḍ ? Ayen ur yelli ara d amsisan i tesqamut taɣelnawt i ubeddel akked tugdut(CNCD) ? Ayen ur yeddi ara di tikti n Jamel Zenati? Ayen ur yelli ara ɣer tama n Mass Ɛli yehya Ɛebdnur ? Ayen wer timlilit netta akked Saɛid Sadi ? Awah tasertit iberdan‑is nnḍen di tmurt‑a, axmir i d as‑ssen degs i nnḍen iḍarren ijehden. Wergin nettu tid‑ak‑nneɣ. Werǧin ad neffeɣ seg ibaxixen . Ma zik yenna umedyaz: « ma dagi neḥwaǧ‑iken, si tmura n medden ulayɣer », ass‑a asen‑nini : « ma gar‑aneɣ neḥwaj‑iken, ma si lbiruyat‑nwen akked d tebratin‑nwen ulayɣer ». Nufa ziɣ yeshel wawal, ma deg annar am yal tikkelt telha tiyita s uzedduz deg iqerra yugin annuz.

Llant tnekriwin, llan diɣ imerwayen am akken id as‑qqaren : « yettban usigna si tekkat » . Llan iberdan yesufuɣen am akken llan wid yettawin s ifri, tit ur nefriẓ rbeḥ ɣef txessart ad tawi bab‑is ɣer yir tegnitt . Aḍu i d‑iṣuḍen ɣef « tmura tiɛrabin » yerra luḍa d asawen ɣef iden iqemḍen ṣṣut, ma di tmurt‑nneɣ ar teɛqel Faḍma argaz‑is assen ad d-iban yixef‑is !

2 COMMENTS

  1. azul, annaγ a Hamid agma,teẓriḍ tikli-nni n Yemsaliyen ar wanda i γ-id-tessaweḍ? Mehri neγ Bujeddra timetti γer i ttxemmimen mačči d tagi-nneγ! atan win yeddan yid-sen yettu tin-is, Bujeddra iḥesben iman-is d aggag, deg uγmis n elwaṭan yeqqar: nekk ur leḥḥuγ ara d Σabdennur Ali-Yeḥya neγ d Saεid Sadi, acimi? acku ayen i d-yekkan ar Iqbayliyen, netta ur s yesra ara, εni yettadder-d tafsut n 80 neγ tin n 2001, ma yudder-tent-id siwa s ccer, am akken d-yewwet s ccer deg Σebban Remḍan akk d Amiruc, wigi amezruy-nsen nutni d i Σuqba ar Butefliqa, mačči am umezruy Imaṭuben

  2. azul, annaγ a Hamid agma,teẓriḍ tikli-nni n Yemsaliyen ar wanda i γ-id-tessaweḍ? Mehri neγ Bujeddra timetti γer i ttxemmimen mačči d tagi-nneγ! atan win yeddan yid-sen yettu tin-is, Bujeddra iḥesben iman-is d aggag, deg uγmis n elwaṭan yeqqar: nekk ur leḥḥuγ ara d Σabdennur Ali-Yeḥya neγ d Saεid Sadi, acimi? acku ayen i d-yekkan ar Iqbayliyen, netta ur s yesra ara, εni yettadder-d tafsut n 80 neγ tin n 2001, ma yudder-tent-id siwa s ccer, am akken d-yewwet s ccer deg Σebban Remḍan akk d Amiruc, wigi amezruy-nsen nutni d i Σuqba ar Butefliqa, mačči am umezruy Imaṭuben

Comments are closed.