Tikti: Akken meqqer usirem, i ɣezzif webrid

2

Ɣas ugtent fell-ak tedyanin tiqesḥanin, ɣas dumen-tt fell-ak lemḥayen, ur s-berru i usirem…Ur qeṭṭeε layas imi tamurt tettidir yir ussan deg umezruy, la tekkat, txebbeḍ, tettnadi ɣef ubrid yessufuɣen ɣer wanda yefsi ujeǧǧig n tlelli. S azekka d assawen ad d-ihub waḍu d asemmaḍ, ad d-yessaki akud yezzan s tmess n ṣṣeḥra…deffir n wedrar ad d-teffeɣ yiwet tafat, ad temḥu tagut-nni iɣummen igenni n tmurt iserhaben. Ur gezzem asirem, ɣas tamurt huǧren-tt at lemleḥ mi akken icudd yixef-is. Ur tekkes asirem, imi abrid i d-tewwiḍ yessufuɣ ɣas yeččur d isennanen, abrid-nni irekḍen yiḍan. Abrid-nni iɣef ifassen ttwaqqden deg tergin, abrid-nni iɣef uzzlen idammen n wid yeɣlin si tedyanin i ten-ixedεen !! Ur tekkes asirem, lli allen-ik, ẓer akin i wedrar s wudem amaynut ad d-tessaliḍ tidet yeffren deffir n ṭṭiya n yiṭij. Ur tekkes asirem, ma ulac ad k-yeṭṭef facal, ad k-tɣunfu lmut. Tamurt ur tuḥwaj imeṭṭi-k akken tuḥwaj tikti-k …Ma yella d facal tif xir tarewla, ali s igenni n tsusmi, abeḥri aḥlawan, ccnawi n yifrax. Ad k-mlen abrid n Yiwen, win yeṭṭfen deg Yiwen ur yettaggad ula yiwen. Di taggara… ulayɣer tekkseḍ asirem, ur k-iqqim wayen yezrin; akken ad tfarqeḍ i lebda ayen akk iɣef tεetbeḍ d wayen tḥemmleḍ …akken ad tnefleḍ ɣer wexxam n tidet. Ad truḥeḍ ul-ik ihenna. Ad d-yegri yisem-ik i lebda deg umezruy n Tmurt n Yiqbayliyen, n Lezzayer n uzekka.

2 COMMENTS

  1. Tanemmirt a Crif ɣef weḍris-ayi-inek.
    D tidet d akken yessefk yal yiwen deg-neɣ ad yili yeččur wul-is d asirem, imi akken qqaren: win yettidiren d win ilan asirem. Ihi d lawan anesǧuǧǧeg asirem deg yal Aqbayli , akken ad igzu belli ma nesdukkel tikta-nneɣ akked iɣalen-nneɣ ad iseggem uzekka-nneɣ. Am ass-a iṭij n tlelli d timanit n Tmurt n Yiqbayliyen ad yali, ad yecceɛceɛ ɣef yal Aqbayli…. imir ɣas anemmet, a-n-awi ulawen-nneɣ hennan ɣer wexxam n lebda.
    Tanemmirt i tikkelt nniḍen a Crif a gma.

  2. yelha usirem,maena ula d’sseber yesea tillisa.ihi tamurt ur tett sseggim ara wehdes,d nekkwni idd bwu anexumel iy ghalen nnegh,wa nekker att nexddem.d’acu kkan ghef ayen nettwali as aggi,tamurt nnegh,amzun akken ur tesseara imawlan,dayaggi igg sqrahen ul,tamurt lejdud tughal d’asuki.win idd yusan yebbwi,akken yecna lewnas ghef roman,maca mazal-itt ar as a.tilufa idd yefghen di teghamsa n’tmurt ussan aggi yezrin,am telufa n tukkarddiwin di sonatrach ed wevrid amoqran n lwest est,sbeggnent edd tillufa yaggi belli tamurt nnegh ur tesei imedebbren tuklal tesea imukaren igg sedduyen timsal n’tmurt ghef lahsab llefaydda nsen macci il fayedda n’tmurt. ed wegdud.alama sani ar atkkemel akka?

LEAVE A REPLY

Please enter your comment!
Please enter your name here