Timenɣiwt n yiman deg Tmurt

3

Deg iseggasen agi ineggura ulac ass ur nettali war ma yegla-d s isalan n yiwen neγ n yiwet inγan iman-is deg tmurt nneγ. Tamnaṭ n Bgayet, Tizi wezzu d Tubiret, ṭṭfent taqacuct deg leḥsabat n wuṭṭunen n wid i ttqeṭṭin deg iman-nsen.

Tuget d ilmeẓyen d tlemeẓyin n ddaw 30 iseggasen. Maca ayen yessewhamen akken annect-agi iḍerru-d, yerna ula d yiwen ur d iclig. Amzun akken d izan i iγellin mačči d imdanen.

Imḍebbren n tmurt d uɣlif n tezmert ur t-id-iggir ara akk deg leḥsab. Ur gin ara kra n usenfaṛ akken a wellhen ilmeẓyen d imawlan γef twaγit-agi izemren ad taγ kra twacult akken tebγu tili.

Deg iseggasen n 90, Tahar Djaout deg ungal-is umi isemma iεessasen “les vigiles” yewhem amek iγeblan akk yellan deg teggnit-nni ur ssawḍen ara imdanen ad nnγen iman-nsen am akken tḍeṛṛu deg Jappu (Japan). Ass n wass-a newweḍ ar yiwet n teggnit nniḍen, ideg ulac yiwen ur nessin ara xerṣum yiwen inγan iman-is.

Tifukal ugtent, yal wa acu i ihedder. D acu kan deg tmura i yesεan iγeblan-agi, deg tezrawin i gan ɣef tfukal-agi, ufan d tujjya i s-ilaqen. Iɣawasen n uwelleh, ttwaxedmen. Yal amdan deg Uwanek akked tmeti fkan-d afus deg uwelleh d tmusni ɣef taluft-agi.

Deg tmurt n Lezzayer, anager inaw n ddin i s-ttarran i wigad yesteqsayen ɣef taluft-agi. “Ur tesεim ara azref ad tenγem iman-nwen, ma ulac d abrid ɣer tmess d ǧahennama”. Ma d wiyyaḍ qqaren akken win ara ifernen ad ineγ iman-is mačči d argaz / mačči d tameṭṭut”. Amzun akken wid ineqqen akka imann-nsen tgen akk leḥsabat-agi?!!

Ass-a n wussan, yewweḍ-d wakud akken ad ffγen imdanen seg wekraf-agi i ten-yuγen qeccuc meccuc akken ad εerḍen ad gen kra. Yal yiwen ahat izmer ad yefk tazmert-is. Tiddukliwin tewwi-d ad d-lhunt d taluft-agi. Imusnawen ad megren tamusni-nsen, ad tt-fken i wigi. Ma yella aǧeǧǧiḍ ineṭteḍ ula d layas. Ticki yegma yettbuεbun, ineṭṭeḍ. Acu xas akken asirem daγen ineṭteḍ, ma yella nerra-t d netta i d iswi-nneγ deg tuddar d iγerman n tmurt-nneγ.