Tirza n FFS ɣer Sṭif i lmend n tefranin n 29 wembir i d-iteddun

4

S ddaw leεnaya n Qassaman i yeldi anejmuε-is ukabar n Tirni n Iɣallen Inemlayen iḍelli 17 wembir deg tzeqqa n uxxam n yidles n temdint n Sṭif, ur nessaweḍ ara ad teččar xas ma 400 n yimekwan kan i tettawi.

Ugar n 300 n Yiqbayliyen i yerzan ɣer temdint n Sṭif ladɣa tuget si tama n ugafa ( At Yeεla, At Brahem, At Wartiran… ) imi seg mi newweḍ ar uxxam n yidles Hewwari Bumedyen, ur nesli i wawal yexḍan i Teqbaylit.

D aqerru n leǧrida ɣer useqqamu n lwilaya n Sṭif, mass Buǧemlin Brahim, i yebdan awal s tejmilt i yerra i temnaḍin i d-yezzin i Sṭif. D ayen yesserfan ilmeẓyen yessutren deg-s ad d-yader timnaḍin n Yiqbayliyen. Segmi i yessewhem wid yellan di tzeqqa. Acku yebda inekker, yeskiddib wid yesseɣlayen deg wazal n FFS. Ɣef wakken i d-yenna; akabar-a d aɣelnaw mačči d aẓiwan, yerna d win yesεan amezruy lqayen; ikemmel yenna mass Buǧemlin s Taεrabt :{  » Nsel i kra la d-katen deg ukabar-nneɣ, qqaren-d d akabar n Tmurt n Yiqbayliyen kan. Kra-nniḍen qqaren-as d akabar n talakt ( laïcité ) nekk ad d-iniɣ aya-gi d lekdeb, Tirni n yiɣalen inemlayen d akabar n Yizzayriyen akkit d win yekkaten ɣef Waεraben akked Yefrunkufunen. »}

Deg wawal-is, yuɣal-d Σli Lεaskri ar wuguren ufan deg uheyyi i tefranin-a am wid ara iεassen ɣef tezdeg-nsent, imi ttuεeggnen uqbel ad yebdu udelel n tefranin.

Di taggara n unejmaε, yeεreḍ uɣmis-nneɣ Tamurt.info ad-yefk kra n yisteqsiyen i umaray amatu n FFS, maca Amaray amatu, ikkukra ad d-yer ɣef usteqsi amenzu yeεnan talakt, imi nessuter ma yella akabar d win yellan n talakt; s talɣa-nniḍen, nεewwed-as asteqsi ma yella yekkat FFS ɣef talakt, yerra-d mass Lεaskri d akken talakt d aεzal n tsertit ɣef udabu u akabar-is yekkat ɣef waya; ma d awal n mass Buǧemlin ( aqerru n leǧrida ) yugi ad d-yehder fell-as.

Di taggara nesteqsa-t ɣef Usenṣeb n Tmaziɣt ma yella kra ad d-yuɣal ɣur-s ukabar di tmendawt? Yezzi, yenneḍ deg wawal, mass Lεaskri, i wakken ad d-yini{: » Wagi si gar imennuɣen-nneɣ. »}

Di tagara, neṣṣaweḍ ad negzu belli ger imeɣnasen n ukabar n FFS, llan kra ṭfen imeḍqan, ur ssinen ara, imenzayen akked umennuɣ n ukabar, maca ttusbedden-d i wudem asertan akken kan ad d-begnen belli akabar n Tirni n Iɣallen Inemlayen d aɣelnaw mačči n Yiqbayliyen kan!

Lmulud Yunsi