Yal tamurt s ideɛɛacen-is !

2

Tamurt-iw am tmura n medden irkelli, tesɛa ula d nettat ideɛɛacen-is ɣas akken ur cuban ara ɣer ideɛɛacen-nniḍen. Ɣur-neɣ ur tekksen ara iqerra, ur zellun ara si tmegraḍ; d immal-nsen kan i la neqqen.
Ur yelli d adabu KAN i ineqqen idles akked tutlayt, d ideɛɛacen-nneɣ itt-yeǧǧan tettmettat; amek ara tili tsekla ma yella ur nettaɣ, ur neqqar idlisen yuran s teqbaylit?
Amek ara yaru yiwen ma yella ur as-ttnuzun ara yidlisen, ma yella ur sellen ara yes-s yimdanen iḥemmlen tasekla?
Ideɛɛacen-nneɣ stahzayen di tutlayt, sseḍlamen adabu, ttafen-t-id ssebba: d netta kan i d aɛdaw n tutlayt d yidles.

Ideɛɛacen-nneɣ kkaten, ttḥaraben ɣef twennaṭ akken ila ssexraben di tmetti; yettɣaḍ-iten yifer ma yekkaw, ma yuɣal d awraɣ akken ur ten-yettɣaḍ uqcic ur nessin taɣuri, ur nessin ad yemmeslay akken ilaq s tutlayt-is.

Ideɛɛacen-nneɣ ḥemmlen tamurt-nsen; ssenǧeq yezga gar ifassen-nsen, ma yella d ul-nsen d timura-nniḍen, d tutlayin d yidelsan-nniḍen i ten-izedɣen. Ḥemmlen-kem a tamurt mi ara fɣen kan seg-m!
Amek-it udgud ur nesɛi taskla ibedden? Amek ara yiẓid yimmal, amek ara iṣeggem uzekka ma yella nerkeḍ ayen ara aɣ-yawin ɣer-s? Amek ara tzuxxeḍ s tmetti iḥettben imedyazen-is, imyura-s, inaẓuren-is d imeslab?
S wumi ara yili uwanek? Yes-neɣ neɣ s iberraniyen?
Ini-d amek-iten imeɣriyen-nwen ad awen-d-iniɣ amek-itt tsekla-nwen?

Irnaten Murad