Yennayer 2960

2
268

Aseggas-a, aṭas n tmeγriwin i d-yettwaheyyan ilmend n Yennayer n Yimaziγen 2960. Imaziγen yettidiren di tmura n lberrani suddsen-d timeγriwin meqqren ilmend n wass yecban wa, am tiddukla n “Yedles amaziγ54” n temdint n Nancy i d-yeswejden yiwet n tmeγra anda i d-tecna yiwet n tcennayt s wazal-is, tagi d Malika Dumran deg tzeqqa n tmeγriwin n Vandoeuvre ass n ssebt 09 yennayer 2010 anda ara d-yili ula d imensi. Azekka-nni n lḥed 10 yennayer 2010, tiddukla tadelsant “Ça cartonne” n temdint n Noisy, swejden-d yiwet n tmeγra s wahil d amarkanti anda tella temzikent n dḥuḥ, n lfeṭa d ufexaṛ imaziγen, Γer tama-s tella temzikent n teklut. Ahil d win γezzifen, tella terbaεt iḍebalen n At Γebri, tameddit n wass d Malika Dumran ara-yecnun. Seg yidis nniḍen, Muḥemmed Σellawa ula d netta ad yecnu ass n 5 furar 2010 akked “le Ballet Berbère” di temdint n Roubaix,

{{Acu i d Yennayer?}}

Yennayer d ass amezwaru n useggas imaziγen, yebdan lewhi n 590 uqbel talalit n Σisa, aseggas-nni i yerbeḥ ugellid amaziɣ Cacnaq ṭṭrad i d-yellan gar-as d Iferεunen di Maṣer, deqqal tagelda tis 22. Yennayer d agur yesfilliten i lxir, rrbeḥ, lerẓaq, talwit, ɣef waya i t-sfuggulen Imaziγen. Amek i d-yettili usfuggel n yennayer? Aṭas n wansayen i d-icudden γer Yennayer, xeddmen imensi n yennayer neγ llan wid yeqqaren imensi bu sebεa isufar. Zellun iyuzaḍ, dγa zik yal aεeggal s uyaziḍ-is, yerna yal yiwen deg-sen ma yewweḍ 17 neγ 18 iseggasen ad yezlu i yiman-is. Xeddmen lweεda s wayen zemren. Mačči daya kan. Llan wansayen nniḍen am ttesḍila tamezwarut i weqcic amectuḥ akken ad yeǧhed ucebbub-is. Xeddmen taswiqt anda aqcic ad d-yawi aqerru n wezger akken ad yuγal d aqerru n wexxam.
Ihi aseggas merra ameggaz i yal Amaziγ anda yella, anda yebγu yilli.

{{Yennayer Ameggaz}}

Anṣuf s useggas amaynut
Ferḥen imawlan n tmurt
Ass-a d tameγra n Yennayer

Yal tamnaṭ yeffeγ-d ṣṣut
Am urgaz am tmeṭṭut
Nnan timlilit s inurar

Ass-a wwin-d akk s ttbut
Muḥal ruḥen di tatut
Acḥal i yelha wurar

Atan teldi tewwurt
Dayen tekkes tagut
Iṭṭij-nneγ yufrar

Ay atmaten ilaq ad necfut
Γef wid γ-iqellan tarbut
Ur nufi ula d asiger

Deg yimi ssareẓgen-aγ lqut
Yal ass sewjaden-aγ-d lmut
Bγan laṣel-nneγ ad yenger

Rrbeḥ ay atma ur ifut
Ad nressi llsas a t-nebnut
Sseεd-nneγ ad yekker

D lawan ad neṭṭef taqacuct
Ad nefru yal taluft
Ur nelli d ccetla ibenduyar

Nekni d imawlan n tegdut
Yir awal ur t-nessugut
Yettban fell-aγ sser

Tamsalt-nneγ d tamacahut
Yal tasuta teḥku-tt
Tirrugza tezdeγ idurar

Sγur Islam Bessaci

2 COMMENTS

  1. Yennayer ameggaz i Leqvayel akk anda ma llan , i leqvayli n tidett, i leqvayel n teqvaylit matchi i wid ilehhun ghef u3ebbudh
    Deg wayen d-ghrigh deg udhris -agi , d ayen yakan i d-ghrigh deg yesmal nnidhen, ama s tefransit ama s teqvaylit, tett3awadem i yeghsan asewwi.

  2. Yennayer ameggaz i Leqvayel akk anda ma llan , i leqvayli n tidett, i leqvayel n teqvaylit matchi i wid ilehhun ghef u3ebbudh
    Deg wayen d-ghrigh deg udhris -agi , d ayen yakan i d-ghrigh deg yesmal nnidhen, ama s tefransit ama s teqvaylit, tett3awadem i yeghsan asewwi.

Comments are closed.