Lwennas: azamul n tlelli

3

Isem-is inuda-d merra timura. Yuγal d ayla n talsa. Yid-s, yewwi isem amaziγ, s teqvaylit yessa-t di yal tiγmert n umaḍal.

Yecna akeffir-nneγ, yessefra aγilif-nneγ, yessemγer deg yiseγ-nneγ, yefka afud i umennuγ-nneγ, icebbeḥ tajaddit-nneγ. Am wakken yessider tinekkit-nneγ ara yidir deg wul n tmazγa ur t-ntettu ara. Ad d-yeqqim d yiwet gar tqucac n umezruy amaziγ.

Lwennas yedder d ilelli, yugi lqid n udavu amesvaṭli. Aḍar-is inuda akal aqvayli, yezreɛ deg-s asirem n tlelli :

Win i k-yennan sanda tleḥḥuḍ, inas »nekk d amaziγ ».

Zik i d-iveggen taqvaylit:
zigh mačči d targit ivan-d yisem-im.

Yemla-yaγ-d amek ara nili di lisser: « win i k-yennan d acu i d tafat, inas: d iγallen yedduklen ».

Asirem i t-izedγen, yugar tizzeγzeγt n icinga n tudert:

Xas neqḍen acḥal d itri, igenni ur inegger ara.

Yenjeṛ avrid n tegrawla i tsutwin ara d-yalin:

Ddwa-s ad ncerreg tamurt.

Ur yeǧǧi yiwet, yenna-tent-id merra. Yal tizlitt d tamsirt. Yal asurif yedda, yelḥa-t γef tutlayt-is. Yedder i weγref-is. Yefka tudert-is d asfel akken ad yefssu ujeǧǧig n tlelli.

15 iseggasen degmi t-cleqfen wid ineqqen asirem, ur d-ivan ara wi yellan deffir tmenγiwt-is. Anda ulac tidett d teγdemt ulac talwit. Wid yenγan Lwennas, ad d-vanen ass-a neγ azekka. Ur zmiren ara ad rewlen sdat n umezruy. Annect tevγu tekk-it, ayen zerɛen ad t-megren.

Ulac lettkal γef udavu azzayri ur ntekkes γef tidett taduli acku seg-s ar ghur-s. Ulamek ara neccekti i win i aγ-yewwten. Ass-mi ara ncerreg tamurt, d aγref aqvayli ara icaxen γef yiman-is, imir-nni, tidett anda tella ad d-tvan: ma di tmurt ad d-tekfel, ma deg yigenni ad d-teγli.

Aggad i t-yenγan, ur wwiḍen ara iswi-nnsen. Lwennas yekka-d nnig tatut, ur as tezmir ara lmut. Yeswa adrar s idammen-is, xas tafekka-s ddaw tmedlin, ṣṣut-is ad yebbaɛzeq i levda.

Buɛziz u Cebbi