Tiwlafin n Ferhat Bouda ssuzzurent tafat n yidles-nneɣ di tmurt n Lalman

0
4448
Ferhat Bouda

FRANKFURT AM MAIN (TAMURT) – Ass n 17.03.2022 yeldi yiwen wexxam di tlemmast n Frankfurt am Main/Lalman i tewlafin n Ferhat Bouda. D tameɣra tameqqrant. Axxam yettkemkum (yeččur) d inebgawen (tinebgawin) i d-yewsan ad ẓran tiwlafin-is. Llan daɣen dinna ineɣmasen; (tineɣmasin).

Ɣer tefsirt wssan-d daɣen yemeddukkal-is inaẓuren si Fransa (Zira, Amuqṛan, Mirza). Ladɣa Zira terna cbaḥa i tewlafin n Ferḥat s ucewwiq „a yemma asif yečča-yi“. Inebgawen yeẓran tiwlafin n Ferhat llan ttemduḥasen iwakken ad meslayen yid-s, a t-steqsin ɣef tewlafin-ines, ɣef tmeddurt-is, ɣef tmurt-is. Di tefsirt-a llant aṭas n tewlafin i yexdem mačči kan di tmurt-nneɣ, maca ula di tmura nniḍen am Lmerruk, Libya, Azawad (Mali)…

Taggara n tmeɣra Ferhat yemmeslay-d ɣef tmeddurt-is. Netta yenna, asmi yella d ameẓẓyan deg uɣerbaz di tmurt-is, yewwet-it yiwen uselemad-is acku yemmeslay-as s tutlayt-is tayemmat tazwawt.

Ferhat yemmekti-d sett-is yeẓran kan yiwet n tikkel tafsirt n tiwalafin-ines, aseggas n 2011 di Dzayer tamanaɣt. Nettat teǧǧa tameddurt aseggas n 2016. Ferhat yeḥrez sett-is deg wul-is, acku tella d agerruj n tmeddurt-is.
Awalen-a n Ferḥat kecmen ɣer wulawen n yad (tid) i sen-yeslan. Ula d tawlaft n sett-is tella di tefsirt n Frankfurt am Main. Win i tt-yeẓran iwala udem-is yettcercur d sser akkd tebɣest.

Sgunfu di Talwit a Nna Tassadit At Wakli! Tarwa n tmurt-im atan tettzuxu s umahil n mm-im anaẓur ameqqran Ferhat Bouda.

Tafsirt n tewlafin n Ferhat Bouda ad tili di Frankfurt am Main,
Braubachstr, Seg 18.03.alma d 15.05.2022

Sɣur Akli Azwaw, 22.03.2022

LEAVE A REPLY

Please enter your comment!
Please enter your name here