22 iseggasen-aya i d aɣ‑yeǧǧa dda Lmulud

4

Wagi d Dda Lmulud At Mɛammeṛ, 71 di tmeddurt-is, tewwit temttant di Ɛin Ddefla. Aḍu-nni i as-d-izwaren aseklu-nni i d-izzewren deg webrid-is mi d-yuɣal si Lmeṛṛuk…Ikfa-yas awal.

D yiwen seg imusnawen i d-tefka tmurt n yeqbayliyen. D aqbayli yefkan tudert-is i wakken ad tidir teqbaylit-is, ad yidir yidles-is amaziɣ ur yeǧǧi ula d amḍiq deg akal n Tmazɣa. Si zik i d-yerra s lexber d akken ayen i d-ǧǧan imezwura d taɛkemt ẓẓayen, maca irfed-it weḥd-s s tufra.

Yedhem tiẓgi n iwaɣezniwen am iḍ am ass weḥd-s. Awal-is yewweḍ ɣer Iqbayliyen, yessemɣi-d deg-sen tismin ɣef tutlayt d yidles-nsen, yerra-asen-d iseɣ, teddun s nnefxa, yerna-yasen-d tirrugza.

Dda Lmulud yenna: « Zik tutlayt-nneɣ nettmeslay-itt kan d ameslay, tura ilaq a tt-neɣer a tt-nettaru. Ma llan iɣerbazen akken axir, ma ulac wa a tt-yesɣer i wa: ma yesseɣri-tt i yiwen yelha, ma i sin d lfayda, ma i ɛecra d rreḥma, ma i meyya d lkemya. Yessefk a tt-nɣer argaz tameṭṭut; arrac n uzekka d yemmat-sen ara ten-iṛebbin di temẓi, s umata tafat n tutlayt tḥuza yal yiwen ur tḥerrem ula d ḥed ».

Dda Lmulud inuda, yufa ! Issekfel-d tazrart n tmusni n tmurt n Yeqbayliyen, yerra-yas-d amḍiq i Si Mḥend U Mḥend, Ccix Muḥend U lḥusin, Yusef Uqasi akked imedyazen-nniḍen. Isselmed i ilemẓiyen awal, awal azedgan, tira n teqbaylit i d-yessukes deg yimi wuccen.

Jean Pelegri yesseqsa Dda Lmulud: Anta tutlayt i s-tettarguḍ? Yerra-yas-d: » ttarguɣ s Teqbaylit idurar ɛlayen, s tefransist amaḍal ajenṭaḍ… uma s Teqbaylit kan i ttarguɣ ». D acu n wazal yesɛa wedrar ɣur-k? Yerra-yas: » Deg wedrar anda luleɣ deg-s tirrugza… deg wedrar anda luleɣ anagar irgazen kan i d-imeɣɣin ».

Dda Lmulud ur yebɣi ad yili d wayeḍ, yebɣa kan ad yidir d Aqbayli. Akken qqaren: win ur nessin ur neẓri d meskin, netta yeẓra yessen, yenna-d.
Dda Lmulud inuda abrid yessufuɣen ɣer tudert, mačči ɣer nnger n wegdud-is. Dda Lmulud yuggad a teḍru d wegdud-is akken teḍra d Iztakiyen yedren di temnaṭ n marikan n wanẓul. Ass-a, ayen i d-yeǧǧa Dda Lmulud deg igenni iban-d am rɛuḍ. Deg webrid-is ad neddu, amennuɣ-is ad t-nkemmel.