Ad nerreẓ asalu ad nernu adabu!

3

Ur yelli s imeṭṭawen d ineẓman i d-ttawin yemdanen izerfan-nsen. Ur yelli s tsusmi i ttidiren tilelli-nsen, ur yelli d awal n wiyaḍ ar ad ɣ-inekren. Ass-a nwala, neḥdeṛ, neẓra amek iɣ-tebra Lzzayer, amek id d-negra weḥed-nneɣ. Am di yal tikkelt nettqabal tilufa s yiseɣ, nettqabal imnekcem s dreɛ d laɛqel, am di yal tikkelt nefka idim d asfel ɣef wakal d tlelli.

Ass-a nekker am yiwen wemdan, ncemmeṛ i yiɣallen-nneɣ, nerẓa asalu, nqubel lmuḥal s tegma-tt, tagmatt-nni nɣil tekfa, tagmatt-nni id ɣ-nnan widenni id aɣ-tt-isaɛraqen, id aɣ-iqqaren ur telli. Tagmatt-nni ara ad ɣ-yawin ɣer tegrawla.

At Lzzayer teẓẓun deg-neɣ yir awalen, yettenfufden am tmes: « tagmatt ger-anneɣ temmut », « limmer ad nḥekem nekni s yiqbayliyen ad nemyučč », « limmer ad tegri ger-anneɣ ad nemsengar »…atg. Aya yakk d tikerkas! Ur yelli yiwen izemren ad yenker tillawt-nneɣ, ur yeččukku ḥed di tlilit-is. Seg wasmi i d-nefruri ar ass-a, gar-aneɣ i la nettidir, d nekni i iḥekmen iman-nneɣ s yiman-nneɣ, di timanit iɣ-igren irebbi si zik-nneɣ. Almi d asmi id d-kecmen wiyaḍ ger-aneɣ i nebda ntettu taqbaylit, laɛwayed d laṣel, i yebda nnif yettuɣal d tinzert kan yellan d ayla ula n lmal.

Ma yella nebḍa ass-a, d nutni iɣ-yebḍan, ma yella nennuɣ ass-a d nutni iɣ-yesnaɣen. Ma yella wwten-aɣ ass-a d nekni i iɛemden. Ur yelli d FFS neɣ d RCD idiri d wid iten-isexdamen, ma yella tebḍa tegmatt d atmaten i yennuɣen( i snuɣen ). Amdun leɛmer yesluɣ iman-is!

Laṣel, tutlayt, tilelli, iseɣ d timanit ur ten-id-neggar ara ɣer rreḥba i wakken ad ten-sawmen yimsewqen, ur ttnuzzun ur rehnen, ur yelli fell-asen win ara isewqen, ma wer yelli d nekni. Ur yelli d ayen suturen yimdanen, ayen yellan yella ur yelli dayen ara d-yennulfun, neɣ ur yelli d ayen ara yettwaḥarmen, ara yettwanekren.

D acu id as-d-igran ass-a i win icukken di tlilit-is ? Ur yelli ɣer wayaḍ ara tafeḍ tifrat, tifrat ad deg-k i tella a yaqbayli: d aqbayli i telliḍ, tamurt-ik d tamurt n iqbayliyen, tutlayt-ik d taqbaylit, tleḥḥuḍ s laɛwayed-ik. Akka i telliḍ, d tagi i d tilawt-ik, ur yelli ara tesutreḍ deg-sen ayen yellan deg-k, ayen telliḍ. Ma yella mačči d timanit tagi, d timunent. Imdanen la suturen amek ara yilin, nekni negra-d la nessutur ma ad nili! Ma yir abrid yeffel-aɣ, ẓret tagmatt tgunni-aɣ.