Ay Aqbayli fren neɣ qqim, di Lezzayer ur k-id-ittṣaḥ uleqqim !

7

Seg wasmi i yefra ṭrad-nni amcum, fell-ak ay aqbayli ur tefri, fell-ak ur yuli wass. Ar ass-a deg-k ttkelixen, deg-k zuzunen, ɣas akken ussu-k d inijjel. Deg 1949 ar ass-a deg-k ttdeqqimen, deg-k nekren. Tegriḍ-d di tizi n was-a, ger wayen yellan d wayen tebɣiḍ ad yili, deg-k cwami n yiḍelli ur lḥiment, ljerḥ-ik ur teffiɣen idamen.

Seg 62 kečč d afran, ɣas akken fell-ak iɣeblan ur frin. Tessalayeḍ wid ara k-yeččen, wid ik-yeqqaren d kečč i d lhem n tmurt, d kečč ay dir…
ɣas akken aḍar tegguleḍ ur d terriḍ, ar ass-a deg-sen tferneḍ, deg-sen tettextiriḍ, seg-sen ur yelli win id d-isersen tiṭ-is fell-ak, ula seg wid-ik.

Ikabaren yellan di tmurt n iqbayliyen, ( FFS & RCD ), mi id d-iwḍent tefranin ara d isbedden aselway i tmurt, ttawin-d yiwet n tezlitt “ Nekni d ikabaren iɣelnawen d ikabaren yerṣan di rebɛa n tɣemmar n tmurt n Lezzayer…” Mi ara d-awḍent tefranin n tɣiwanin ttawin-d tizlitt nniḍen “ Limer iqbayliyen ur aɣ-fernen ara, d ikabaren nniḍen ara tt-yawin, ara yeṭfen tamurt n Iqbayliyen, d ikabaren IBARRANIYEN (FLN, RND, MSP…) ara ad aɣ-iḥekmen…”. Melmi yeffeɣ fell-asen d Izzayriyen, mi iḥwaǧen tamurt n Yiqbayliyen ad d-uɣalen d Iqbayliyen, d Imaziɣen, d arraw n tmurt…atg. D wigi iwumi qqaren: “ tetten d wucanen, ttrun d umeksa ” neɣ “Kkaten aɣyul, ddarayen tabarda-s”

Limer iqbayliyen kesben yiwen n yiswi: taqbaylit, tugdut, tilelli d tlilit… tilli ad agin tifranin qeccuc meccuc, d tiyita ara fken i tmurt n Lezzayer, d tiyita n ṣwab, d tiyita ara d as-yilin d tamsirt, acku ala dagi ila yetteḥwiǧi udabu agdud, ala akka i yezmer ad as-d-isel, wammag ayen nniḍen, neɣ akken nniḍen yessen ad yesɛuẓẓeg. Ala ma yaḥwaǧ-ik yiwen i tzemreḍ ad as-tinniḍ ala.

Irnaten Murad