Iminigen

9

Dacu kan medden ttrajun daɣen kra n wass ad yuɣal ɣer taddart-is s lǧyub-is ččuren d iṣurdiyen. Yernu yessefka ad yawi yid-s kra n tmusni ur nelli di tadfdart-is.

Tuffɣa n tarwa n tmur-nneɣ ɣer tmura n medden mačči n wass-a, maca tella seg zik-nni:

– Wa yeffeɣ i wakken a d-yawi aɣrum i tarwa-s,
– wa tessufeɣ-it yar tegnit di tmurt-is, yerwel,
– wa tewwi-t leqraya,
– wa yewwi-t zzhu.

Di tmurt qqaren daɣen: « Tinigt (lɣurba) tjebbed bab-is ».

Dɣa d tidet: Iseggasen ttafgen, ttɛeddayen am targit.

Ur yettaki yiwen alma yufa-d iman-is icab, yuɣal d amɣar.

Llan kra (llant kra) ɣilen iminigen ttjiḥen, dehhun kan d yiman-nsen. Tettun tamurt-nsen, tettun imawlan-nsen.

Dacu kan tella tidet nniḍen. Di tmura n medden mačči dayen fessusen ad yelmed yiwen tutlayt taberranit. Mačči dayen fessusen ad yefhem yiwen abrid n tmeddurt n imezdaɣ-nsent. War ma yettu yiwen iɣeblan n tmeddurt am aẓɣuẓar mgal iminigen neɣ ayen imi qqaren « racisme ».

Acḥal d iminig imi tezza tasa-s, mmuten imawlan-is war ma yerwa tameddurt yid-sen.
Acḥal d iminig imi tezza tas-as, yemmut bab-as neɣ temmut yemma-s, war ma yella di temḍelt-nsen.

Di tmura n medden iminig yettmektay-d ccbaḥa n tmurt-is, yettmektay-d tayri n tyemmat akkd tisetmatin.

Llan imingen ssawaḍen ttuɣalen ɣer tudrin-nsen. Dacu kan llan kra deg-sen ad qqimen kan kra n iseggasen dinna, dɣa a sent-uɣal tmeddurt d tarẓagant di tmurt-nsen. Dinna ad mmektin tameddurt di tmura n medden, anida tella tlelli, tella tayri.

Dɣa ad uɣalen ɣer dinna. Ula dinna ad ddren kan kra n wakud dɣa ad mmektin daɣen ayen yelhan di tmurt-nsen.

Ihi aṭas deg-sen ur ssibninen tameddurt di tmurt n imawlan, ur tt- ssibninen di tmura n medden.

Akken i s-yenna Sliman Azem: « Ma neqqim nebɣa a neddu. Ma nedda nebɣa a neqqim ».

Annect-a yesmektay-d ayen yenna umusnaw (afiluẓuf) alman Arthur Schopenhauer: « Amdan yezmer ad ig ayen i s-yehwan. Maca ur izemmer ara ad yebɣu ayen yebɣa ». S talmant: {« Der Mensch kann machen, was er will. Er kann aber nicht wollen, was er will ».}