Mazal imcumen-nni sɣiɣiden

3

Aṭas n Yeqbayliyen glalzen deg uɣebbar yekkren deg waluḍ ur bnin fell-as, acku wid yerwin tagnit, usan-d berra n tmurt n Yeqbayliyen, ahat ran ad tekker i tikelt nniḍen.

Idammen n Uqbayli ugin ad ḥebsen, yal ass ttmarayen, saẓẓayen tarusi n talwit di tmurt n Yeqbayliyen. D tayi i yebɣa udabu amesbaṭli, Iqbayliyen ad teddun di tegdi deg iberdan, ad sweḥcen deg uzal qayli. Ulac ass ara yezrin war ma yewwi-d yid-s taqriḥt: Tixazabiyin, aḥwas n imɛelmen, takerḍa…

D iwaɣezniwen i mazal ttidiren di tmurt n Yeqbaylen, teddun ɛinani ger medden, mi tensa tmes ad snettgen deg-s akken ad ttsiɣ i tikelt-nniḍen ! Ur ttaǧan Aqbayli ad yidir di talwit, skud mazal-iten, iswi-nnsen ad t-awḍen?! Zemren ad s-negren tamurt n Yeqbayliyen s lekmal-is.

Yak d nutni i as-yennan, Iqbayliyen mednubit werǧin dduklen, di tegmat i ten-tt-uɣen. Anwa i s-yennan akka? Acku wigi di tdukli ur sɛin ara amkan di tmurt n Yeqbayliyen. Imi ma ara nuɣal ɣer tidet, tadukli tennulfa-d ɣer Yeqbayliyen n zik s way qublen yal acengu di yal tallit.

Wigi d imcumen ur nesɛi ul neɣ tassa, yessefk ɣef Yeqbayliyen ad ḥudden ɣef iman-nnsen akked tmurt-nnsen.
Kra n twaɣit yeḍran ussan yezrin yekka-d seg imcumen-ayi. Ass-a, Iqbayliyen ḥsan yerna ẓran dakken ur d-yeqqim wettkal ɣef at ufella, begsen s izerman akken ad ḥarben ɣef yiman-nnsen. Skud dduklen; iṭij ad ten-d-yettqabal.