Welleh ma teswiḍ tibselt

3

Degmi i ak-qqaren : “ddunit teddewwir, tettneqlab am teḥbult n uɣrum”. Waqil dɣa d tidet! Zik, win yekkren ɣer wayeḍ ad as-yini : “Welleh ma teswiḍ tibselt”. Deg ssuq ass-a, welleh ma tzemreḍ ad t-twaliḍ neɣ ad t-tqerrbeḍ. Yuɣal d Si lebsel! Ilaq ad tiliḍ d Si Flan iwakken ad d-tegluḍ yes-s s axxam. Ɛecralaf i lkilu! D lewhayem! Mačči d lebsel i aɣ-d-yecqan da. D ssebba kan i as-d-nufa iwakken ad yili wayen iɣef ara d-nemmeslay. Taggara-ya, ɣlayet lxeḍra, ɣlayet lfakya. Yeɛni tecɛel tmes deg sselɛa akk, yenza wulac. Ulac akk ayen i irexsen. Ayen tennuleḍ, ad k-id-yennal. Ah! Surfem-iyi, ttuɣ : anagar irgazen i irexsen. Mazal kan cwiṭ, ad teslem ula d nutni ttnuzun deg leswaq. A wi yeẓran anisa i aɣ-d-tekka teɣrit? A wi yeẓran s anda i tleḥḥu?

Iban d nekni. Tekka-d seg-neɣ. Nettwet s yifassen-nneɣ. Yernu mazal nendel allen-nneɣ, nɛemmed i wayen i la iḍerrun yid-neɣ. Amek?!

Tamezwarut n tmezwura, amur amaqqran deg yilemẓiyen-nneɣ xeddmen akk, ɣer Mesyu ‘‘QQIM’’. Ttwaxlasen akken yeqwem : s tɣimit, s wulac, iban lḥal! Tanekra seg yiḍes ɣef ttnasfa n wass, tuɣal normale. Deg leqhawi, ur tettafeḍ ara amkan. D imazzagen (spécialistes) akk n ddiminu akked lkarṭa. Ṭṭlam yeɣli-d ɣef wallen, tamart, acebbub, iberdan qeflen, tiwwura sekrent, idrimen ulac, … Awer ẓren s anda tleḥḥu. Ufan-as abrid i usmiddeɛ : ulac lxedma. Tenger ddunit. Ma d tiferkiwin n ddin n baba-tsen qqiment akken d lbur. Tuɣal-asen tfellaḥt d lɛib. Ala! Ma ulac ad amsen yifassen-nsen, dderya n Sasa. Dɣa iruḥ-asen kullec. Teḍra-yasen am wid akken ur neṭṭif deg Rebbi, ur nferreǧ iḍebbalen, neɣ am win akken ur neṭṭiḍ bubbu, ur neṭṭir deg Uqbu. Lemliḥ deg-sen, d win ara ixedmen ayyur ad yeqqim rebɛa neɣ xemsa. Deg lweqt-a, akken ad tuɣaleḍ d argaz, ad tizmireḍ i yiman-ik, laqen-k ma ulac 35 ar 40 n yiseggasen. Cwi kan llan yimawlan. Maca ḥeslen deg wayen i d-urwen. Meɛna ahat bezzaf llum fell-asen. I nutni bɣan-tt akken zeɛma? Teffeɣ fell-asen? D tamɛict n waydi. Wissen!

Tis snat, d nekni i as-iɛemmden armi truḥ ifer taberruyt. Acuɣer? Yenna Lewnis deg wawal-is : “win yebɣan ad tseggem, iseggem iman-is!”. D tidet!. Ammer nabɣa ad tbeddel fell-aneɣ, tili nbeddel-itt. Ar zemreɣ ad awen-ggalleɣ — ɣas ur yi-ttamnet ara, d akellex — ar tesɛin ɣef mya deg-neɣ, d wid i ixeddmen anagar lefsad deg tmurt-a. Yuɣal wayen yelhan ibeddel ssifa. Yecbeḥ, bnin mi yuɣal d ayen n dir. Takerḍa, ddɣel, tismin tisemmamin, … Ayen akk ur nelhi, nneɣ. Nessibnin tudert yes-s. Neqqar d adabu-nneɣ ay diri! D nekni ay d adabu. Yal yiwen deg-neɣ yettḍebbir, walukan ɣef yiman-is. Ihi, ur ilaq ara ad nekkat aɣyul ad neddaray tabarda. Tidet kan, win yewten iman-is s ufus-is, fiḥel ad yezwir ɣer yimeṭṭi.

Taneggarut, yernu d tin s i d-nufrar : d tidderɣelt. Γas akken ulac tin n dir i aɣ-izeglen, neqqar kan : “kullec igerrez”. Rray d ayla-nneɣ. Abrid ideg nleḥḥu, yessufuɣ, ɣas ɣer yiɣẓer. Ur nqebbel win ara aɣ-ineqden. Win iweɛɛan i gma-s, yessenger-it. Leɛyub n medden akk nwala-ten, anagar wid-nneɣ. Akka! D nekni ay d nekni. Yefka-yaɣ Rebbi iles d aɣzzfan, nerra-tt anagar i tmeslayt. Nhedder kan nrennu, armi aɣ-teɛreq ula d tutlayt-nneɣ. Nerra-tt imir-nni i usbernunnez s tid n medden. Leqraya, zeɛma neɣra! Surfem-iyi : ‘‘Nexxx…ra’’!!!!!. “Ulac deg-neɣ”, yenna Muḥya.

Tura, ad ilin deg-wen wid ara as-yinin : yehwa-yas kan. Lebsel yuɣal d asentel i tira. Nekk, ad asen-iniɣ : ur yi-d-yecqi lebsel, ur yi-tewqiɛ deg yilemẓiyen, texlu neɣ teɛmer. Aɣbel-iw, d tira. I yi-d-yecqan, d tira n tutlayt-nneɣ. Izen ay bɣiɣ ad awen-n-siwḍeɣ da, d tazmert i tla teqbaylit akken ad d-tini akk ayen ttidiren wid i tt-yettmeslayen. Meḥsub ayen nettidir, nettxemmim, nezmer ad t-id-naru, yernu s tutlayt-nneɣ. Nekk, uriɣ-d ɣef lebsel. Kunwi tzemrem ad d-tarum ɣef wayen i awen-yehwan. Tzemrem!. Bɣum kan!.

Ad teččem lebsel a Librobro.

{{Md U Remtane IGHIT}}

Aselmad deg tesdawit n Bgayet.

3 COMMENTS

  1. Tanemmirt a Md U Remtane ɣef umagrad-ayi-inek. D ayen igerrzen nezzeh, imi d tidet akken id tenniḍ neɣ yenna unaẓur: » Win yebɣan ad tseggem iseggem iman-is ». Acku d tidet zeddigen am waman id yeffɣen deg weslaṭ n wedrar aqbayli, d tin ur nesɛi nnqada… Amer yal aqbayli iseggem iman-is, tili tamurt n Yiqbayliyen dayen tseggem… ssin ɣur-s anweɛɛi ad-n-seggem Lezzayer s umata neɣ ula ahat d Tafriqt ugafa …acuɣer ala..? Imi d tidet amur meqqren deg Yiqbayliyen i y-as-yenwan dayen tqeɛɛed, tseggem akka i tella akka tura, mazal anezzi anenneḍ a ddin qessam!!!! Ahat ihi ay Iqbayliyen seggmet iman-nwen akken ad nessiweḍ akken anseggem Tamurt n YIqbayliyen …ssin akkin anwali ayen nniḍen.
    Tanemmirt i tikkelt nniḍen a M U Remtane a gma!

  2. levssel aggi inek am u remdan,ttuzzema it id ezzmedd s’allen i wegdud,ghef lahsav levssel aggi inek tamurt nnegh texsser axatter d’agdud aydir,wama adavu yelha.ihi nekk add inigh,ma ar atettfedd timessleht i terkkabbin,zegwirend medden suffela macci swadda.axatter d’adavu igg sexesseren aghervaz n’tmurt id yessufughen aewijen igh yecvan merra.d’adavu igg ttakuren adrim n’tmurt almi yughal uxeddam,yexdem negh yeqim kif kif,lexlas s yelddi ur d yettawi.lehassun,nekk akka i wallagh tamsalt.d’adavu i d seba n ‘twaghit deg inella.

    • Azul: d acu ara k-inigh a gma: awal yenna-yak-t-id umedyaz, anagar am tebghid ad te££uzged i tidet. Ulac aghilif ad as-d-£iwdegh: yenna-yak: « win yebghan ad tseggem, iseggem iman-is » lme£na n umeslay-a, ilaq d kecc yakkan ara yezwiren gher leqwam. Ammer yal yiwen deg-negh ad iseggem, tili adabu, ad yerrezz iman-is, acku yuki ugdud, ulac win i izemren ad ikellex fell-as. s wawal-nniden, d kecc akked nekk ay d adabu. At udabu, d atmaten-nnegh, d imdanen am kecc d nekk. Kker a « win n da » ma ad nebdu tikli. Anda tufid gma-k ye£wej, sweb-it, negh rrez-it, saki-t, mmel-as abrid. win yenghan tidet ad tt-yaf.
      Ahlil ma tkemmel akka.

LEAVE A REPLY

Please enter your comment!
Please enter your name here