Azekka ad yif ass-a ma nefka azal i yiḍelli

Nessen uguren kan mi ara ad aɣ-ɣeḍlen. Azekka-nneɣ nettraǧu-t nettraǧu acu ara d aɣ-d-iniwel, ɣas messus, ɣas merriɣ, semmeḍ neɣ yaḥma, ala ayen ara aɣ-d-yawi ara yilin.

Tadyant i d-iẓedmen fell-aɣ, ad d-taf ifassen-nneɣ d ilmawen, s wulac i tt-nettqabal, ala ayen ara tawi seg-neɣ, ma yella d ayen ara d aɣ-d-teǧǧ d ayen ara yesreẓgen ussan-nneɣ akked yimal-nneɣ.

Ayen ur la nettḥezib ara i taggara ? Ayen ur la nsaḥsab ara ɣer sdat ? ayen i la nettagad abeddel ɣas d ayen ara aɣ-yessiẓen ɣer sdat ? D acu i la nxeddem ass-a akken ad aɣ-yiẓid uzekka ? dɣa d tidett ad aɣ-d-iṣaḥ uzekka ?

Isteqsiyen meyya, tiririt yiwet « ur neẓri ara » !

Necba deg wegdud t-ttbeddil tegnitt, agdud i ɣef yettḍebbir wakud. Awal sdat zzman ur d aɣ-d-iṣaḥ, ɣas ad aɣ-d-iṣaḥ ur yelli d acu ar ad d-nini.

Akka i tḍerru i kra n win ur neẓri d acu-t, win ur neẓri ansi id d-yekka, win ur nessin.

Nesexlaḍ ger win yesnen akked win yeɣran, nesexlaḍ ger win yesnen ad d-yesenṭeq akked win ifehmen. Lefhama mačči d leqraya, leqraya mačči d lefhama. Mačči s kra n win yeɣran yefhem, mačči s kra n win ifehmen yeɣra. Win iḥuza uɣarbaz adarɣal amek ara i wali tafat, amek ara iwali azekka?

Nettmekkin tarwa-nneɣ ɣer tidderɣelt, nwahem amek ur ttwalin ara. Nettmekkin tarwa ɣer tiɛuggent, nesteqsay ayen ur la ttmeslayen ara?

Imal akken yettiẓid, i yettirẓig. Azekka ad aɣ-yiẓid ma yella nbeddel tikli n uɣerbaz, azekka ad yif ass-a ma yella nefka azal i yiḍelli. D aɣarbaz id aɣ-yesdarɣilen, yes-s i yezmer ad nwali.

Ass i deg ara taɣreḍ ay aqbayli deg uɣarbaz s teqbaylit, aɣarbaz ara yagin taddiyanit ( ddin n win i t-yebɣan ) ad yili aɣerbaz ara yegren irebbi i talakt, win ara yerren, win ara igen talast ger win yumnen d win ur numin ara. Aɣarbaz ara inadin tamusni s tusna, aɣarbaz n tidett, ass-nni ad ak-yiẓid uzekka-k, ass-nni ad teẓreḍ d acu-k, s ani i la tettedduḍ, ass-nni ad tekseḍ uguren uqbel ad ak-nefḍen.

Imal yarǧa-k meqqar qabel-it s wayla-k.

Irneten Murad