Anda-k ay awal-iw!

10

Yal tutlayt tetter-d seg tutlayin nniḍen kra n wawalen. Ma d nekni s Yizwawen nerwi-tt aṭas. Yal ass nettawi-d awalen seg tutlayt taɛrabt i tutlayt-nneɣ, n neqq kra n wawalen deg-s.

Amedya:

a nurar: yuɣal a nelɛeb

Gma: yuɣal d xuya

Tefra: yuɣal d xlaṣ

Ameddakkel: yuɣal d arfiq

A naru: yuɣal a nekteb

A necnu: yuɣal a nɣenni

Ih: yuɣal d anɛam

Dɣa Araben ttzerrigen i Yizwawen, qqaren win imeɛnen yessefk ad yini anɛam mačči ih neɣ acu. Cfiɣ di taddart-nneɣ ma yerra yiwen i tiɣri n wayeḍ s wawal «d acu», dɣa a s-inin medden: «A k-yenttu wuncu». Ula d icennayen-nneɣ mara ad ttmeslay amur ameqqran s tefransist. Mara ad cennun amur ameqqran n wawalen-nsen d taɛrabt.

Llan wawalen i d yeffɣen seg tutlayin nniḍen uɣalen d tazwawt. Ulac aṭas i yeẓran awalen-a aẓar-nsen mačči d tazwawt. Amedya: taberwiṭ yeffeɣ-d seg tefransist „brouette“. Tazallit yeffeɣ-d seg wawal aɛrab «salat».

Llan kra n wawalen nettu-ten. Amedya: Ussan n smana akkd leḥsab. Nekni nessen kan yiwen, sin. Ayen akk nniḍen neqar-t s taɛrabt. Annect-a ɣas yella ɣer Imaziɣen nniḍen, d acu kan ar assa nugi a t-
nelmed nekni s Yizwawen.

Ula di tudrin-nneɣ yezmer ad yaf yiwen awalen s tezwawt ur nelli di kra n taddart nniḍen. Amedya: nekni neqqar di taddart-nneɣ: azegzaw am ṛbiɛ. Di taddart Mezgug (At Weɣlis) qqaren „adal“. Assmi sliɣ awal-a ḥusseɣ i yiman-iw am akken yessufeɣ-iyi-d yiwen seg tesraft. Llan kra n wawalen ɣas ffɣen-d seg tutlayin nniḍen maca ur yessefk ara a ten-yekkes yiwen. Amedya: Apolis, taberwiṭ.

Ma d awalen imaynuten am: azul, tanemmirt, iḍ ameggaz, rnan ccan i tutlayt-nneɣ. D acu kan awalen imaynuten yessefk ad kecmen ɣer tutlayt Tazwawt cwiṭ cwiṭ. Neɣ mulac amur ameqqran deg tarwa n tmurt-
nneɣ ad yekkukri ad yelmeḍ tutlayt tazwawt yeččuren d wawalen imaynuten.

I kunwi/kunemti d acu ara tinim di taluft-a?