Timuzzeɤt tugar taɛrabt-tineslemt (amur amezwaru)

10

Wid i as-igezmen timiṭ i teẓrakti-ya d sin n yimusnawen imasiḥiyen n tmura n Waɛraben n umalu, yiwen d Aɛiraqi, wayeḍ d Asuri. Snulfan-d tiẓrakti-ya iwumi semman « taɛrabt-tineslemt », akken ad « sdukklen » timura ideg ttmeslayen taɛrabt akked tid ideg tella tneslemt ; d timura i yellan deg tallit-nni seddaw uzaglu n tmura n Lurup, gar-asen Fransa, Ṭelyan akked Legniz. S yinaw-a-nsen, ran ad d-segzin belli timura-ya yellan seddaw uzaglu n tɤerma n Lurup deg lawan-nni, lant ula d nutenti taɤerma i ten-yesdukklen deg umezruy ; d taɤerma i yellan d tazemmart, mucaɛet ula d nettat deg yiwet n tallit akken ; d taɤerma i yeslemden i at Lurup tamussni akked tussniwin, … Meḥsub, d taɤerma i d-yewwin cwiṭ i talsa !!!!

Ihi, taɤerma-ya iwumi semman « taɛrabt-tineslemt » ay qqaren imussnawen-a, tezmer ad d-tɛawed talalit, tezmer ad tesdukkel timura-ya « taɛrabin-tinselmin » ay setɛemrent tmura n Lurup, tezmer ad tent-tessiweḍ, di tazwara, ad sufɤen « listiɛmar » seg tmura-nsen, ad d-ḥellin tilelli-nsen ; syin ɤur-s, zemren ad aɤen yes-s leḥkem di tmura-ya… alamma yefna leɛmer.

Tiẓrakti-ya tebna ɤef taɛrabt akked tneslemt, acku – akken i t-id-segzin – yiwet ur tezmir ad tili war tayeḍ. Daymi i ɤilen at « taɛrabt-tineslemt » belli ur yezmir yineslem ad yili d uhu aɛrab ; ihi, deg teẓrakti-ya, Aɛrab, d ineslem ; ineslem, seg tama-d, d Aɛrab ! Teddez tebrez !
Dɤa, mačči ala tamgirda-ya i yellan deg yinaw-a aɛrab-ineslem, ɤas akken aṭas n yimdanen i yumnen s takti-ya. D amedya, aṭas deg Leqbayel, wid n zik d wid n tura, ay qqaren « Nekni s Waɛraben.». Aredqal ihi ad d-nuɤal ɤer temgardiwin n tiẓrakti-ya.

Tiẓrakti-ya tenna-d aya, teqqar-d ayen yugaren aya. Imi i as-semman “taɛrabt-tineslemt”, ran ad d-inin belli uqbel tizri n tneslemt, uqbel talalit-ines …kra ur yelli yelha ; ala tallest (ṭṭlam), ala timɤendeft akked teɤyulit i yellan deg wallaɤen n yimezdaɤ n tmura-ya.
Yiwen n uneɤlaf n ddin n Tmurt n Lezzayer, mi t-steqsan ɤef tesreḍt n yimezdaɤ n Tmazɤa uqbel tirzi n tneslemt, yenna : “Uqbel tirzi n tneslemt ɤer tmura n ‘Lmeɤreb’, ur neẓri ara d acu i d ddin n yimezdaɤ-nsent “…
Dɤa, cwi kan imi i yesteɛref belli llan yimezdaɤ, llan yimdanen deg tmura-ya …uqbel tirzi n tneslemt ɤer tmura n Tmazɤa ! Tin ɤur-s, inaw n uneɤlaf-a deg-s tiwuɤa mačči d kra. Dɤa, ma ur yessin amezruy n tmurt-is, d tawaɤit ! Ma yeẓra – akken ẓran akkit at leɛraḍ – belli imezdaɤ n tmura n Tmazɤa n leqrun yezwaren wis 7/8 llan taɤerma, llan tutlayt, llan ddin.. tili ur t-id-yenni ara, tinna d tawaɤit-nniḍen : d tiderɤelt niɤ, akken neqqar s teqbaylit d “leɛma lgeḥla”. Dɤa, tiẓrakti, akken tebɤu tili talɤa-s, tesderɤil imdanen, tettarra-ten d uzligen, d ungifen, ur zmiren ara ad walin ayen yellan akin i tmazirt. Ihi, akka i teḍra d yimdanen tuɤ tiẓrakti “taɛrabt-tineslemt” : ttwalin ala ayen yellan deffir, ur ẓerren ara ayen yellan ɤer sdat, zelmeḍ niɤ yeffus.

Ihi, d tiẓrakti-ya ay slemden di lakulat n tmura-ya n Tmazɤa, ay zerɛen deg tɤamsa-nsent, deg leǧwameɛ-nsent, …; yes-s, sawḍen armi samnen aṭas n yimdanen akked yimezdaɤ n tmura n Tmazɤa belli d “Aɛraben” ! Ula d akal n Lezzayer, akken i t-id-uran deg tmendawt n tmurt n Lezzayer, d “aɛrab” ! Qwiɤ amek armi ur ten-id-yerǧim wakal-a ! Amezruy n Yimaziɤen mḥan-t s win n tneslemt akked d win n Waɛraben, s umata ; idles n Yimaziɤen yuɤal akkit d “lxurafat” ; tultlayt-nsen – sdat taɛrabt iwumi semman “tutlayt n Allah”, “tutlayt n lǧennet”– ur tettusemma, ur tettwabdar niɤ, ugar, tettwaḥqer, tettwaɤunzu, tettwarkel… Yeqqel uqelmun s iḍarren ay at leɛraḍ ! Zik-nni, deg tallit talemmast, igelliden tinselmin n tmura n Tmazɤa, snulfuyun-d tinasliwin (généalogies) akken ad d-seknen belli kkin seg texlift n Rrasul, belli seg Faṭima ultennbi i d-frurin ! Anamek n waya lqay nezzeh, ma yessefra-t yiwen : meḥsub, ma ur yelli yiwen d “Aɛrab”, ur izemmer ara ad yeḥkem di tmurt-is, ur ili azref ad yili d agellid n tmurt-is !

Tagi d tiẓrakti ! Tura ma nuɤal-d ɤer tidet, s amezruy, dɤa ad naf aṭas n tuccḍiwin, aṭas n tkerkas i deg-s.
Tamezwarut : am wakken i t-id-nenna iwsawen, imussnawen-a yakan i d-yesbernunzen tiẓrakti-ya …mačči d inselmen ! Syin ɤur-s, aṭas n yigduden deg umaḍal i yuɤen tineslemt seg wasmi d-tennulfa deg lqern wis 7, ɤas akken ur llin ara d Aɛraben, wala deg tutlayt, wala deg yidles, s umata ; d amedya, Imaziɤen, Iraniyen, Iṭerkiyen, Ifɤanistiyen, Ipakistanyen, … Tin ɤur-s, llan Waɛraben deg Lɛiraq, deg Palistin, deg Suriya, …ur nelli d inselmen.
Tis snat : la d-teqqar tiẓrakti-ya belli taɤerma ur telli uqbel tinnulfa n tneslemt ɤer ddunit ; la d-teqqar daɤen belli d tineslemt i d-yewwin tilelli akked d tafat i umdan, gar-asen tameṭṭut. La d-teqqar belli uqbel tirzi n tneslemt ɤer ddunit, meṭṭlen tiqcicin akken d timuddurin !
Ma nuɤal cwiṭ s amezruy n tmura n Tmazɤa, ad naf :
Tamezwarut : asmi d-rzan Waɛraben ɤer tmura-ya, ufan-d lxalat d tigellidin, gar-asent Dihya – iwumi semman “Al-Kahina”. Ihi, ddin-a neɤ d idles-a i d-wwin, ur d-yewwi ara tilelli i tmeṭṭut, wala i urgaz. Win ur numin, ad iwali anta timura anda i ɛebbden yimdanen, gar-asen irgazen, tilawin rennun bennun-asent lemqamat, ma mačči deg tmura n Tmazɤa !
Tis snat : aneɤlaf n ddin n tmurt n Lezzayer yewwi-d ad iɛawed taɤuri i umezruy, ma tuɤ yeɤra-t yakan ! Amek, ur yeẓri ara belli aṭas n yimezdaɤ n Tferka Ugafa n lqern wis 3, 4, 5, …. d imasiḥiyen !? Ur yesli ara s yisem n Saint Augustin, ababat n teklizt n Tferka !? Ur yesli ara s yisem n Saint Donat, atg ?

Di tegrayt ihi, timuzzeɤt tugar taɛrabt-tineslemt, tif-itt deg teɤzi n umezruy, deg tidet, deg …

{{Warisem}}

10 COMMENTS

  1. tanemmirt a Warisem, tasnakta-ya n taεrabt-tineslemt, d aḥeckul win mi tekcem ar wallaγ ad yezzi γef uẓar-is a t-yemḥu, ammer deg uγerbaz ssγaren timsirin am ta, tili ulac wara inekren baba-s d yemma-s, neγ ad yeğğ ad yuγal wayla-s d ayla n wiyaḍ, tili ur newwiḍ ara ar uxessar-a deg i d-neggra ass-a, asafar-is ala tagrawla, ma dduklen Imaziγen, zemren ad kksen aṭṭan-a imelken Tamazγa,
    ma ulac maḍi, xersum d tadsimant i tmurt n Yeqbayliyen.

    • Azul,

      Ssutergh-as i Wallay (=Rebbi) bab n umeghrad ad ikkes g wulawen n imezdagh n Tmazgha tasnakta
      Ta£raneslemt isers-asen deg-sen Timmuzgha ayd igan tamust-nnsen idettan. Ssarmegh-asen i ymazdaren ad d-fafan gren s uxemmuj n wa£raben asen-ittlen adu ugar n mrawt-snat n tsutiwin ay-a.
      Tanemmirt tameqwrant i ymezdagh n Tmurt-n-Igawawen (= la Kabylie) ghif tazzliwin d umennugh-nnsen ghif tlelli, ar asen-ssirimegh tidim d wafud ameqwran ard slellin Tamazgha akal n Imazighen seg tizwiri n tudert!

      • Tamurt n Yigawawen mačči d “la Kabylie”, a gma ; d amur seg-s kan. “La Kabylie” d Tamurt n Yizwawen. Yessefk ad nessemgired gar Izwawen akked Igawawen ; Igawawen d taqbilt n Yizwawen izedɤen Ǧerǧer, gar-asen : Micli, Larebɛa, at wasif, …

  2. Azul, nedder nettwali almi nehder i win i yettmeslayen tidet isemma i yiman-is war isem. Ghas akka d war isem, tanemmirt imi i d-terrid tamughli i wallagh-nnegh acku « Ghas ur nxuss deg wallen nxuss awali… » am wakken i d-yenna umedyaz. Ammar d lebghi-k ay ul, nlul-d d iùdanen, syin akkin d imazighen, syin akkin d leqbayel, gher taggara yakk i yal yiwen yextar ddin-is, am wakken llan wid i wumi ur yehwi wara. Ayen yessewhamen dakken atas seg wid ur numin ara s yal ddin, xedmen atas n wayen yelhan i txelqit. Xas ma ughalegh d ineslem, xas ma ughalegh d amasihi, ghas ma ughalegh d ayahudi, ghas ma ur dfiregh yiwen, uqbel kullec nekk D AMAZIGH, ttmeslayegh, ttidiregh, qeddcegh, hemmlegh, ttarugh…s tmazight-iw. Ma d ayen yellan gar-i d Rebbi, ur d-ggaregh yiwen nniden gar-anegh. Ur lligh mgal aàraben, la mgal irumyen, la mgal …. Ur righ ad ughalegh d aàrab, ur righ ad ughalegh d afransin negh d amarikan. Aggadet Rebbi nekk d AMAZIGH « tugim ad tfehmem abbuh yeàdel wass-a d yidelli, i tura ad d-nini mmuh negh dacu tebgham ad d-nini? ». TANEMMIRT TAMEQQRANT A WAR ISEM

    • WARISEM d isem am wiyaḍ, am Muḥend, Akli, Ḥlima, … Tixutert mačči deg yisem n win (tin) d-yennan, d ayen akken d-yenna. Ur nelli ara deg tmurt ideg yezmer umdan ad d-yemmeslay ɛinani, ideg yezmer ad d-yini ayen yettxemmim … Tamurt-a ur deg-s tugdut, ur deg-s tilelli, akken ad d-yemmeslay yiwen war tagdi, war akukru … Tin-nniḍen, WARISEM d amdan kan, ur yesɛi ara lɛesker ara iɛassen fell-as, wala akabbar neɤ amussu i yellan deffir-s

  3. ahat timuzzeght tugar taeravt-tineslemt,maena aeraven ugaren imazighen.wama amek iggezmer yiwen ad yefhem tamacahutt aggi lebbniyat n lejjwamee di tudrin,bbaedda di tmurt n leqvail.venun lejjwamee s’issurdiyen n’sen,u ttexelissen tajernatt n’l’imam yal aggur,akken ad lemden ddin b’uraven »n’wan s yes ar aeddin gher lejjenet..yebbwuyagh ali bwunhhar.ma aeraven ur fhimen ara,nekkwni s’imazighen ur neseara ula d’elmux,neqqers.wama aeraven nanaghed kkan n’vegha att negrem,akken tamurt lejdud n’wen att nerr d’ayla lejdud nnegh.nekkwni n nayasen yexddakkun cghul,n’vda ahuddu degg imannegh s’yedrimen nnegh.u s tezmert nnegh.

    • Mačči d Aɛraben i d-zzmeɤ deg umagrad-a a Win n da… Zzmeɤ-d Imaziɤen i tmellek teẓrakti taɛrabt-tineslemt armi i ten-terra d imeslab ur neksib lɛaqul-nsen, armi ur i das-yeɛreq lasel-nsen … Teḍra yid-sen am yiɤyal yerwan leɛlef akked temẓin, la ttɤilen uɤalen d iserdiyan … Aṭas n yigduden deg umaḍal i yuɤen ddin n tneslemt, maca ur uɤalen ara d Aɤraben ; ṭṭfen deg lasel-nsen, ttmeslayen tutlayt-nsen, rnu fkan-as udem i tneslemt-nni …

      • tiẓrakti n taεrabt-tineslemt teqqar: win ur nelli d aεrab ur iḥekkem ara ula di tmurt-is, deg tallit-agi deg nella yewεer nezzeḥ ad tḥekmeḍ anda llan, acku nwala llan yakan wid i nekren lassel-nsen, i wakken ad awḍen ad ṭṭfen amkan d aselway n tmurt, γas zemren, ifen wiyiḍ di leqraya, maca ulac win ssawḍen ar tura, ammer dγa ad yessiweḍ walebεaḍ deg-sen, ma ur t-nγin ara, wid n Ldzayer, a d-asen waεraben-inselmen n tmura taεrabin a t-nγen, am akken i s-yenna Cadli di tefsut-nni n taman: ma neqbel Tamaziγt ad tili, ad ttaḍsan fell-aγ watmaten-nneγ n tmura taεrabin. Ihi yessefk ala weṭṭu d yemdanen yettxemmimen akka,

        tanemmirt a Warisem, γef umagrad-a deg d-tessegzaḍ tiẓrakti n taεrabt-tineslemt, a wi yufan ad yawweḍ akk ar ilmeẓyen-nneγ a t-γren,

  4. …Nniγ-as nekk imir-a, yewweḍ-d lawan akken ad nsiked iman-nneγ γer lemri akken ad nwalin leεyub-nneγ.Imaziγen aṭas i suγen deg yiseggasen iεeddan:Nekni ur nkennu ara i ddel, nekni d lefḥul, nekni ur neneger ara, nekni akka,…..atg;maca d lmuḥal nnan-d:Nekni d neččur d leεyub,ur nefki ara azal i yiman-nneγ,sxedmen-aγ-t wiyaḍ….D amedya,di allit imeslemt ifarisiyen, kecmen γer lislam akken ad ḥyun aẓar-nsen,ksen-d amkan deg tgelda taεrab,uγalen akk d lewzirat,d jjiniralat i ixedmen tumast tafarsit segmi i ẓran i izemren ad yili d « Lxalifa » ala win i d-yefrurxen seg « at Benu Hacem »…..Wi nneγ,ama d Ben Tumert ama d Ben Tecfin,nudan amek ara qlen d slaṭen,rran aẓar-nsen seg Uxxam n Nnbi=aẓar aberrani….ttxilwat ay imeγriyen, surfet-iyi ur zmireγ ara ad kemleγ ameslay,ulac s wacu akk ara izux yiwen!
    D acu ara lummeγ Yuba
    Neγ Buxerruba
    Yiwen s taεrabt i tt-yebna
    Wayeḍ s llata
    Ara lummeγ d Masinisa
    Netta akked Yisfaqes

    D acu ara lummeγ Ben Badis
    Dnub i yiri-s
    Lukan yufa-t-id tebna
    Ad izux s tummast-is

    D acu ara lummeγ Ben Bella
    D terbaε-is merra
    Lukan di segmen Busuf
    Tili atan Σebban yella
    D Acu ara lummeγ mmi
    Mi yi-d-yemmeslay langli
    Lukan rebbaγ-t f tjaddit
    Ay-id-yessiwen s teqbaylit.
    Buyisem

LEAVE A REPLY

Please enter your comment!
Please enter your name here