Timuzzeɤt tugar taɛrabt-tineslemt (amur wis 2)

14

Kfiɤ awal-iw s tefyirt-a : “Timuzzeɤt tugar taɛrabt-tineslemt, …”. D tidet dɤa, d timuzzeɤt ay ɤezzifen ɤef taɛrabt-tineslemt s waṭas. Amek ? Taɤerma taɛrabt-tineslemt tebda seg lqern wis 7 deffir Sidna Ɛisa, ma yella aṭas ; timuzzeɤt, nettat, tebda aṭas n leqrun uqbel talalit n Sidna Ɛisa. Ulayɤer ahat ara nessuget awal ɤef waya, imi neẓra tagelda n Mass Nsen, d amedya, tella uqbel Sidna Ɛisa. Yiwet seg twuɤa ihi i s-d-tegla teẓrakti-ya i Yimaziɤen akked umezruy-nsen d ta : amezruy-nsen ur yebdi ara seg lqern wis 7, am win n Waɛraben-Inselmen. Maca imesluben-a i tmellek teẓrakti taɛrabt-tineslemt, ur d-rrin lexber s waya – d ismawen-nsen i d awal-,sen : d imesluben ! Tawaɤit-nniḍen d ta : deg tmuɤli n Waɛraben-inselmen ayen yellan akkit uqbel tisin n tneslemt yettusemma d “Al-ǧahiliya”, meḥsub d yir tallit, d tallit n tallest (ṭṭlam), d tallit anda ur ssinen ara Waɛraben, gar-asen at Quric, “Abrid n Allah” ; ur ssinen ara azal n umdan ; ur as-gin ara leqder i tmeṭṭut, wala ccan ; dɤa, amedya i d-ttakken deg uɤerbaz d wa : “ Deg tallit-a, Aɛraben meṭṭlen tiqcicin-nsen mi ara d-lalent, akken d timiddurin”

Seg tama n teẓri, deg Leqran, ahat yella kra n tlelli i d-yewwi i umdan, xersum tameṭṭut ; maca deg tilawt, d ayen-nniḍen i iḍerrun. D amedya, deg “Acariɛa” tameṭṭut d azgen n urgaz ; awal n urgaz yeswa awal n snat n lxalat ; d amedya, werǧin neẓri, wala zik wala tura, tuɤal tmeṭṭut d ccix n tmesgida– “ur iǧuz ara !” Ulamek ara ẓẓalen yirgazen deffir tmeṭṭut ! D amedya, ar ass-a, deg tmura n Waɛraben n tidet, yecban Ssaɛudiya, tilawin ur lint ara azref n udɤer (lbuṭ) ! D amedya, ….
Ihi, deg tilawt, ur nwala ara kra n tlelli i tefka tneslemt i tmeṭṭut ! Γas akken deg wawal tella ; d amedya : “Lǧennet deg lqaɛ n uḍar n tyemmatin i tella”. Ruḥ tura fhem kra kečči !? Des libertés purement formelles, quoi !

Tura ad d-nuɤal ɤer tmuzzeɤt. Timuzzeɤt d taɤerma n Yimaziɤen ; Imaziɤen d iɤerfan izedɤen Tamazɤa, akal iwumi semman Yifransisen “Afrique du Nord” ; tin iwumi semman Yinselmen “Al-Maɤrib” ; tin iwumi semman Waɛraben-inselmen “Al-Maɤrib Al-ɛarabi”, … Twalam, yal win i d-yerzan, ad as-yefk isem i as-yehwan i wakal n Yimaziɤen !

Timuzzeɤt tugar taɛrabt-tineslemt, acku tezwar-itt s amaḍal. Uqbel tisin n tneslemt ɤer ddunit, yuɤ lḥal Imaziɤen fkan-d aṭas i talsa. Mačči deg wakal n Tmazɤa i d-tger aẓar tmasiḥit, i tefsa deg leqrun imezwura?! Mačči d at Tmazɤa i d imezwura i as-yefkan udem i tmasiḥit, uqbel timura n Lurup, gar-asent Fransa ? D amedya, Saint Augustin yettusemma d yiwet n tgejdit deg teklizt takaṭulukt.
Seg tama n tsertit, yewwi-d ad nẓer dakken aṭas n Yimaziɤen i yellan d igelliden deg Qertaj, am Hanibal ; deg Rum, am Yuba i akked Yuba Wis 2. Syin ɤer da, deg tallit talemmast, yewwi-d ad nẓer dakken Imaziɤen fkan-d aṭas aṭas i tɤerma tineslemt. D amedya, d Imaziɤen i yebnan tamesgida n Lqahira ; d Imaziɤen i yessawḍen tineslemt akked yidles n tmaziɤt ɤer tmurt n wadda n Spenyul.
Seg tama n tsekla akked tussna, yessefk ad nẓer dakken amezwaru i d-yesnulfan “ungal” (ɤas akken s tlaṭinit) d Amaziɤ, d Apulée de Madaure ; isem-is : Aɤyul n wureɤ. Wid uwumi i semman Yifransisen “les chiffres arabes” sont des chiffres berbères, imi deg Tmazɤa i d-lulen, deg temdint n Bgayet iruḥen ɤer tmurt n Andalus.

Mačči d tamsirt n umezruy n Yimaziɤen ay riɤ ad d-awiɤ da. Llan yimusnawen n umezruy ara d-yinin axir-iw. Riɤ kan ad d-iniɤ belli Imaziɤen wwin-d, fkan-d i talsa aṭas n tɤawsiwin, n taktiwin, n tiẓriwin. Yewwi-d ahat ad neg annect-a akka d tasawent. Yewwi-d ad d-nesken ayen i d-wwin Yimaziɤen i talsa, ama d tiɤawsiwin yerzan lebni, aseswi (irrigation), tafellaḥt, lxedma n wuzzlan, …ama d tiẓuriwin (arts) yecban tasekla, aẓawan, … ama d taktiwin akked tiẓriwin. D amedya, ur cukkeɤ ara belli ayen akken iwumi semman “architecture arabo-musulmane” neɤ “musique arabo-andalouse” ur kkin seg-s Yimaziɤen !!!!

Riɤ ad fakkeɤ awal-iw n wass-a s snat n taktiwin. Tamezwarut, d assaɤ yekkan gar tmuzzeɤt akked Tmurt n Yizwawen ; tis snat d assaɤ yellan gar tmuzzeɤt akked usenfar anserti iwumi semman “Timanit i Tmurt n Yeqbayliyen”.

Akal (territoire) n Tmazɤa yebḍa d imuren, seg zik ; d amedya, akal n Yizwawen semman-as Tamurt ; win n Yimẓabiyen qqaren-as Aɤlan ; win n Yicelḥiyen qqaren-as Tamazirt, atg. Ulac ccekk, yal aɤref n Yimaziɤen ila akal-is, tutlayt-is, tuddsa-s tanmettit (organisation sociale), amezruy-is, … Mi ara nesserwes tuddsa tanmettit n Yimẓabiyen d tin Yizwawen, ad tent-naf ur mwatant ara ; tuddsiwin-a daɤen ur mwatan ara d tin n Yimuhaɤ. Seg tama n ubrid n temɛict, ad naf tamɛict n Yizwawen (n zik) tbedd ɤef tfellaḥt ; tin n Yicawiyen, d anemgal, tebna ɤef tkessawt ; tin n Yimuhaɤ tebna ɤef tnezzut (lbiɛ wecra), atg. D acu i riɤ ad d-iniɤ ?

Riɤ ad d-iniɤ, ɤas akken Imaziɤen bḍan seg zik d iɤerfan, ɤas akken yal aɤref s tgemmi-ines, s wakal-is, s “tutlayt”-is ahat (imi yal aɤref amek i das-isemma i tin-is niɤ i tayeḍ : taqbaylit, tacawit, tumẓabt, tamaheq, tacelḥit, tamaziɤt, …), ɤas akken nemxalaf, yesdukkel-aneɤ yiwen n ufus. Ma mxalafen yiḍuḍan n yiwen n ufus, ihi iɤerfan n Yimaziɤen akken !
Seg tama-nniḍen, asdukkel n yiɤerfan-a deg tallit-a d asenfar anserti yelhan mliḥ mliḥ, maca yessawen mačči d kra. Acuɤer ? Acku iɤerfan-a, ass-a, yal wa deg wanwa awanek (Etat) i yekki, deg wanta tuddsa tansertit i yekki. Iwunak-a mxalafen nezzeh nezzeh, ɤas akken uɤen akkit tiẓrakti taɛrabt-tineslemt ; yiwet, am Lezzayer, d “tagduda” n kra n tamiwin, n kra n yimdanen ; tayeḍ, am Lmerruk, d tagelda n yiwet n twacult ; tayeḍ d …

Yegra-d usenfar-nniḍen. D asenfar n tedsimant n yal aɤref. Ur d-yewwi ara ad nefhem awal akken-nniḍen. Asenfar – akken tebɤu tili ssifa-s – d lebni i t-id-bennun yimdanen, mačči d taɤawsa ay ttafen medden deg ubrid niɤ deg ssuq. Yezmer ad t-id-yeg yiwen ɤef lkaɤeḍ deg wass niɤ deg useggas. Maca deg tilawt, d ayen-nniḍen. Lebni n usenfar deg tmetti yesri seg yimdanen aṭas n lebɤi ; yesri tabɤest akked usfel ; yesri taktiwin, ifadden, idrimen.

Asenfar n TIMANIT I TMURT N YIQBAYLIYEN yuklal leqder. Maca, ula da, abrid yessawen. At Timanit ur d-yewwi ara ad ttun belli Tamurt n Yiqbayliyen deg tmurt n Lezzayer i tella, mačči deg Lurup neɤ tmura n Marikan. Riɤ ad d-iniɤ belli annar n umennuɤ n tidet deg wakal n Lezzayer i ilaq ad yili. S wawal-a, meɛlum, ur riɤ ara ad d-nniɤ Ad necbut iḥuqal i d-yessawalen i watmaten-nsen ad mmten. Ala ! Maca ur yessefk ara ad neg lemtel-a d aɛwin-nneɤ : “Aqemmuc d amger, ifassen d nnger.”
Riɤ ad d-iniɤ daɤen belli amennuɤ n Yiqbayliyen ɤef timanit ur yecbi ara win n Yikaṭuliniyen deg Spenyul : leḥkem aɛrab-ineslem n tmurt n Lezzayer ur yettkanzi ara maḍi maḍi ɤer win n tmurt n Spenyul ; seg tama-nniḍen, Iqbayliyen ur ttkanzin ara ɤer Yikaṭuliniyen.

Taneggarut n tneggura d tamunt n tmuniwin (l’évidence des évidences) : yewwi-d i Yiqbayliyen s umata, ad rren tablaḍt i wul-nsen, yewwi-d ad ẓren tiɤawsiwin akken llant, mačči akken i rant ad ilint : tutlayt tamezwarut n Yiqbayliyen d taqbaylit ! mačči d tafransist niɤ d taɛrabt … Ma ur d-rrin ara s aḍar s lemɤawla, ma ur d-rrin ara lexber s waya, …

{{WARISEM}}