Ussan agi izrin kkren-d kra iqerray n taredsa n tmurt n Ṭṭurk akken ad sseγlin aselway Recep Tayyip Erdugan d udavu ines issedaw uneγlaf amezwaru Binali Yildirim. Mgagin γef kra imukan am tqendart izegren asif Busfur ivḍan tamdint n Istambul, d kra n tisuda am tilizri d umni. Tifarfarin zgant deg igenni n Ankara tamaneγt. Iqerray agi n tredsa γawlen ssufγen-d alγu d akken atan d nutni i ittdebbiren tura. Adavu nsen. Tazmert d ayla nsen.
Maca Erdugan d uccen. Irfed Iphone ines, xas akken iγuc tatrart, u yuzen izen i Iṭṭarkiyen s FaceTime. Inna asen ihi s uweṣsi γur wat! ḥudet tamurt nneγ tamagdayt d uwanek iddan akken tevγam! Isved asen-d wigi yuzlen γilen ṭṭfen adavu am lγerḍ. Irna icuf asen aqendur almi ulamek u fγen-d ar ivardan ad erren lada. Zgan-d sdat isardasen nutni d iγalen n laman i mazal ddan ddaw wawal n Erdugan. Dγa sensen times, isardasen agi imcumen refden ifasen nsen u kemcen ten ipulisen amzun d llufanat. Teddez tevrez. Erdugan irwa taḍsa. U inna-d d akken ad xelsen ayen ur ccin. Leḥvus n tṬ=urk macci tundict i umdan. Ad zrin akken ma llan di tiṭ n tisegnit u ad ttuaesren akken iwata.
Ihi ugar n 3 twinas n imdanen i ittuḥevsen. Gar asen isardasen d iqeddacen deg unagraw n teγdemt. D aḥwas iten iḥwes Erdugan d wid ittazalen fell-as. Acku taredsa tuli-d γef ul-is. Ur as tehwi ara imi tagara agi teffeγ as afus imi d nettat i irefden amennuγ mgal Ikardiyen d Isenselmen n Surya d Lâiraq. Yerna akken i tt imenna Kamal Ataturk, taredsa tella-d d tasudut i umi ittunefk uḥudu n tugdut d uwanek alayiki.
Erdugan, imi netta yufrar-d seg ukavar isneslem, iγuc talayikit, iγunfa tatrart, iγunza tilelli n umdan, yugi akya seg ul-is tilelli n tγamsa. D aya i γef ur d-myezgin ara netta d tredsa n tmurt. Seg assmi iṭṭef adavu n Ṭṭerk tuγal ar deffir tmurt is macci d kra. Iswi-s d adegger, d tarewla akk-in γef utaram xas netta izga isqiziv i tmura n Turuft. Xarttum, am Isenselmen ak n umaḍal, Erdugan d tata, ittneqlav wudem-is akken ad ikmed, ad iffer tidett-is anda ivγu idda. D yir terras. Ur t-ttamnet!
