Izḍem Muḥamed Laḥwayej Buhlel γef medden s ukamyun di Nice, deg uzniq amuqran ittwasnen deg umaḍal d tirni: La promenade des Anglais. Idda γef medden azal n sin ikilumitren, irkeḍ iten. Inγa 84 d amdan gar asen 10 d arrac imecṭaḥ. 16 mazal iten ndaren di sviṭarat. Akamyun ines i t-iḥevsen d wid ittusennan sdat-es am teẓwit. Idda fell asen almi ulamek ara imimeḍ, amek ara ikemmel.
Netta nγan-t ipulisen u ufan γur-es macci d kra n imrigen. Iḥezzem-d uterras agi ar imenγi γef yisem n usγan ines amcum d yir uwanek asenselman ISIS. Yerna atan zuxen-d s imenγi agi iḍelli at icumar n Lâiraq d Surya. Nutni γur-sen d ayen izaden akya. γur sen imenγi n medden ur asen ngi acemmek d anjar n uvrid ar ljennet. A Yemma yemma! Win turez nnya, mel-as neγ qim!
Tiyita yagi ihi di temdint n Nice d tis 3 i deg γlin, mzazalen idamen s waṭas di 20 n waguren agi ineggura. Ttewten medden ula deg ul, ttwaḥazen s ufella, ar daxel. Maca nnumen Iṛumyen tagnitt agi. Tura atenin deg urfan, di ttar. Kra n wussam agi id-iteddun ad muqlen deg Inselmen d wAâraven s nqqar n tiṭ. Dγa taγmist ad vdu awal γef tegmatt gar medden, d akken Inselmen macci yiwen nsen. Ad d-siwel ar talwit d trusi n yiman. Isartanen kif kif, ad refden awal am win n teγmist d win iteqden tasa i medden. Am awalen ittawi waḍu: ur nettanef i yiwen ad iwwet tamurt nneγ, ad nḥud γef uγref nneγ u ad nar akk-in lada γef medden. Maca kra din d awal kan.
Ar tagara, tugdi attan tuγ deg ulawen. Aγucu issa akken iwulem gar medden, xarttum gar Inselmen d wiyaḍ. Lfusi ittwaγzen zik gar asen tennerna assa ugar. Ulamek ak tudart yid-sen Isenselmen agi ugejdur imi a k-nγen svaḥ u ad ak d-aezzin tameddit.
