Di later n Si Muḥend U Mḥend

Deg akal deg i d-yemɣi umedyaz, tamedyazt tessawal i tmedyazt akken ad zdin-t tutlayin, akken ad mǧazin wulawen, amer ad s-d-affen ddwa i ṛuḥ yuzzan seg ḥarruq n wer timlilit.

Di Tuber yezrin deg “Icarɛiwen” tagnit telli‑d irebbi i At Wawal akken ad innin awal. S lqedra n Si “Muḥend U Mḥend” jban-d imawlan n tmusni si yal tama, si yal tamurt.

Ussan-d imawlan n tmedyazt ama si Fransa, Lmaruk, Lubnan, Hayti neɣ tamurt n Leqbayel. Deg tɣuza n Camlal yezdi umyag n Si Muḥend U Mḥend akked d win n Molière. Di lǧǧera n umedyaz tezdi talsa, mmaren-d isefra yerran ṣṣwab ɣer lɛeqel-is.

Telha tuɣalin ɣer tidet :

Acḥal d asseggas

Ur yekkis lɣim ɣef tignawt

Nnig Icerɛiwen

Igenni yeḥzen yettru

Yegger lawan deg yir tallit

Aṭas ur myufan wulawen

Dayem imeṭṭi yeffer

Leɣban deg cciw-is

Idim

Urfan

N tmelsit

Tina yeddan d iseflan ! ( YvanTetelbom)

Lamwaji n Uẓẓefun ccnan ssda n lhu, abeḥri d‑yekkan seg illel ihuz isfra n lebɣi. Tikli tewwi imusnawen ɣer uɣbalu n tidet, tekcem s annar n umezruy, tit tedla ɣef «Suzarus» tucbiḥt akken ad teḥku lɛaz n iḍeli. Llin-d iɣallen s tehri akken ad zemḍen ɣer tasa tayri d wid yettawin nesma-s d aɛwin. Asekud ifal i tallit, iruḥ nnig rwaḥ, akken tisdarin yettmalen leḥmala ad azlen-t deg tiregwa n tirga :

Innid !

Sefru !

Innid !

Keçç d amedyaz

D aggelid ɣef lqum‑ik !

Innid

Mgal tasusmi

Innid

Magal lbaṭal d lhewel-is

Mgal trad d leɣrur-is

Xas tenfiḍ si tmurt-ik

Xas tenfid ɣef yiman-ik

Xas yeɛṛaq yixef i yixef-ik

Xas d amantar telliḍ

Xas d wer leqrar teddiḍ

Tellid d wer tilsit

Teddreḍ d illeli !

Xas yezwi umur-ik

Werǧin yekna lqed-ik

Ssut-ik yessaggad tugdi

Tiɣri-ik, tesergagay iggeni !

Innid !

Innid

Kečč ay agellid ɣef lqum !

( Nicole Barrière)

Tizi Tsemlal azal n 5 wussan d imawlan n teskla : Yvan Tetlbom, Ahmed Laḥlu, kamal Yaḥyawi, Frederique Wolf Michaux, Ait Slimane Noredin, Fadéla Chaim Allami, Xaled Swiher, Xetabi Ahmed, Elvire Maurouard, Nicole barrière, Hamid Ait Sliman, Segini Jugurta, Pierre Bastide, Claude Ber, Husin Ait Geni, Michel Cassir, Jean Louis Châles, Murad Reḥman… d inaẓuren i d-yuffen di ṭif n Si Muḥend U Mḥend aḥiḥa iten-yewwin deg ubrid n yetran. D tidet yella umedyaz n yiwet n talit, n yiwen n umdiq lemaɛna d amedyaz n yal talit n yal amdiq. Si Muḥend izerɛen isfra-as i demma n tikli-s, s texlijin n lejruɣ-is, yefka i wawal awal ara inedhen i yal awal anda ma yella di ddunit. Win yebnan kra s lmul, kra‑nni as-id yer lmul !