Tilawin deg wegraw n taddart (Tajmaɛt)

3
Ilemziyen deg yiḍ
Ilemziyen deg yiḍ

(Tabrat sɣur Akli Azwaw) Llan kra n yirgazen Izwawen ttzuxxun, qqaren: „Tilawin di tmurt-nneɣ ɣur-sent tilelli ur sɛint tlawin n waṭas n tmura-nniḍen. Amedya: Tilawin di tmurt-nneɣ ur teffrent ara udmawen-nsent s teɣennasin, sɛant izerfan i sɛan yirgazen.“

Ma yerzef yiwen ɣer tmurt-nneɣ, dinna ad yaf tidet yesbehdilen irgazen-nneɣ. Ladɣa deg wussan n wezɣal (anebdu) iberdan n tudrin deg yiḍ ččarayen d ilemẓiyen, teffɣen ttbuḥrayen, acku d azɣal aṭas deg yixxamen. Gar-asen ur yettaf ara yiwen tilemẓiyin. Deg kra n tudrin tezmer ahat ad tili tsuraft (exception).  Ula di leqhawi n tudrin-nneɣ ur yettaf ara yiwen tilawin.Tameṭṭut ur tzemmer ara ad teffeɣ anida i s-yehwa am urgaz.

Nekni s Yezwawen nettzuxxu s tugdut-nneɣ, yernu d tidet ɣur-neɣ tugdut ,uran fell-as ula d imusnawen iberraniyen. D acu kan deg wegraw n taddart (amḍiq n tsertit) ur ttilint ara tlawin. Ihi amek i tezmer ad tili tugdut war tilawin? Neɣ tella kra n taddart anida ttilint tlawin deg wegraw-is?

Tilawin yessefk ad ilint deg wegraw n yal taddart di tmurt-nneɣ. Ahat d nutenti ar‘ ad yefken tabɣest i yirgazen i wakken argaz tameṭṭut, ilemẓi tlilemẓit a nemyuṭṭaf afus deg ufus, a ncemmer iɣallen, anecrew tidi tura yakan ɣef tlelli, ɣef izerfan-nneɣ. Ɣiwelt, ɣiwelt! Atan iṭij iteddu ad yeɣli!